تامىز ايىنىڭ باسىندا تاشكەنت، استانا جانە الماتىدا وتكەن الەمدىك جۇلدىز دجەننيفەر لوپەستىڭ كونتسەرتتەرى تۋريزم، قوناق ءۇي جانە مەيرامحانا بيزنەسىنىڭ دامۋىنا سەرپىن بەرىپ، وسى قالالاردىڭ بيۋدجەتىن ايتارلىقتاي سالىق تۇسىمدەرىمەن تولىقتىردى، دەپ حابارلايدى "ادىرنا" ءتىلشىسى.
7 تامىزدا تاشكەنتتەگى «ميللي» ستاديونىندا وتكەن لوپەستىڭ كونتسەرتىنە شامامەن 31,1 مىڭ ادام قاتىسقان، ونىڭ ىشىندە قىزمەتكەرلەر دە بار. ساتىلعان بيلەتتەردىڭ 67%-ىن شەتەلدىكتەر العان، ولاردىڭ ىشىندە رەسەيدەن شامامەن 8,9 مىڭ، قازاقستاننان 2,5 مىڭ جانە باسقا ەلدەردەن كەلگەن قوناقتار بولعان. بيلەتتەردىڭ باعاسى 1 ميلليوننان 4,2 ميلليون سومعا دەيىن اۋىتقىپ، بولجامدى تابىس 25-تەن 105 ميلليارد سومعا دەيىن (شامامەن 1,97 ميلليوننان 8,28 ميلليون دوللارعا دەيىن) جەتكەن.
قور مالىمەتى بويىنشا، كونتسەرت وزبەكستان استاناسىنىڭ سالىق تۇسىمدەرىن 42,5 ميلليارد سومنان (شامامەن 3,3 ميلليون دوللار) كوپ سوماعا ارتتىرۋعا ىقپال ەتكەن جانە قوناقۇيلەردىڭ تولىمدىلىعى 25,7%-عا وسكەن. وزبەكستانعا 15,3 مىڭنان استام شەتەلدىك تۋريست كەلگەن، ولاردىڭ ىشىندە اقش پەن ەۋروپا ەلدەرىنىڭ ازاماتتارى دا بار. كوپتەگەن شەتەلدىك 4-6 كۇندىك تۋريستىك پاكەتتەر ساتىپ العان.
ال قازاقستاندا لوپەس ەكى كونتسەرت وتكىزدى. العاشقىسى 1 تامىز كۇنى استانادا، ەكىنشى كونتسەرت 10 تامىز كۇنى الماتىدا ءوتتى. Tengrinews.kz مالىمەتىنشە، ەلورداداعى كونتسەرتكە 30-دان استام ەلدەن، نەگىزىنەن كورشى ەلدەر مەن ەۋروپا مەن ازيا ەلدەرىنەن شامامەن 10 مىڭ تۋريست قاتىسقان. قوناقتاردىڭ ورتاشا شىعىندارى شامامەن 230 دوللاردى قۇرادى.
ۇيىمداستىرۋشىلار كونتسەرتتىڭ مۋلتيپليكاتيۆتى اسەرىن شامامەن 6,5 ملرد تەڭگەگە (شامامەن 11,6 ملن دوللار) باعالايدى. بۇل ەسەپكە بيلەت، ۇشاق جانە پويىز شىعىندارى كىرمەيدى. لوپەستىڭ كونتسەرتىنە بيلەتتىڭ ورتاشا باعاسى 200 دوللار، اۋە رەيسىنىڭ ورتاشا قۇنى 310 دوللار بولدى. ۇكىمەت كونتسەرتتى ۇيىمداستىرۋعا بيۋدجەتتىك قاراجات جۇمساماعانىن ەرەكشە اتاپ ءوتتى، كومەك قوعامدىق ءتارتىپتى، ءورت قاۋىپسىزدىگىن جانە كولىك لوگيستيكاسىن قامتاماسىز ەتۋمەن شەكتەلگەن.
10 تامىزدا لوپەس الماتىداعى ورتالىق ستاديوندا 35-تەن استام ەلدەن كەلگەن قوناقتارمەن بىرگە 20 مىڭنان استام كورەرمەن جينادى. الماتى قالاسى تۋريزم باسقارماسىنىڭ مالىمەتىنشە، كونتسەرتتىڭ مۋلتيپليكاتيۆتى اسەرى شامامەن 5 ملرد تەڭگەنى (شامامەن 9,2 ملن دوللار) قۇرادى، بۇل تۋريستەردىڭ بيلەت، تۇرۋ، تاماقتانۋ جانە ەكسكۋرسيا قىزمەتتەرىنە جۇمساعان شىعىندارىن قامتيدى.
ايتا كەتەيىك، دجەننيفەر لوپەستىڭ Up All Night الەمدىك تۋرى 8 شىلدەدەن 12 تامىزعا دەيىنگى سوزىلدى. تۋر 13 ەلدىڭ 20 قالاسىن قامتىدى.
