Тамыз айының басында Ташкент, Астана және Алматыда өткен әлемдік жұлдыз Дженнифер Лопестің концерттері туризм, қонақ үй және мейрамхана бизнесінің дамуына серпін беріп, осы қалалардың бюджетін айтарлықтай салық түсімдерімен толықтырды, деп хабарлайды "Адырна" тілшісі.
7 тамызда Ташкенттегі «Миллий» стадионында өткен Лопестің концертіне шамамен 31,1 мың адам қатысқан, оның ішінде қызметкерлер де бар. Сатылған билеттердің 67%-ын шетелдіктер алған, олардың ішінде Ресейден шамамен 8,9 мың, Қазақстаннан 2,5 мың және басқа елдерден келген қонақтар болған. Билеттердің бағасы 1 миллионнан 4,2 миллион сомға дейін ауытқып, болжамды табыс 25-тен 105 миллиард сомға дейін (шамамен 1,97 миллионнан 8,28 миллион долларға дейін) жеткен.
Қор мәліметі бойынша, концерт Өзбекстан астанасының салық түсімдерін 42,5 миллиард сомнан (шамамен 3,3 миллион доллар) көп сомаға арттыруға ықпал еткен және қонақүйлердің толымдылығы 25,7%-ға өскен. Өзбекстанға 15,3 мыңнан астам шетелдік турист келген, олардың ішінде АҚШ пен Еуропа елдерінің азаматтары да бар. Көптеген шетелдік 4-6 күндік туристік пакеттер сатып алған.
Ал Қазақстанда Лопес екі концерт өткізді. Алғашқысы 1 тамыз күні Астанада, екінші концерт 10 тамыз күні Алматыда өтті. Tengrinews.kz мәліметінше, елордадағы концертке 30-дан астам елден, негізінен көрші елдер мен Еуропа мен Азия елдерінен шамамен 10 мың турист қатысқан. Қонақтардың орташа шығындары шамамен 230 долларды құрады.
Ұйымдастырушылар концерттің мультипликативті әсерін шамамен 6,5 млрд теңгеге (шамамен 11,6 млн доллар) бағалайды. Бұл есепке билет, ұшақ және пойыз шығындары кірмейді. Лопестің концертіне билеттің орташа бағасы 200 доллар, әуе рейсінің орташа құны 310 доллар болды. Үкімет концертті ұйымдастыруға бюджеттік қаражат жұмсамағанын ерекше атап өтті, көмек қоғамдық тәртіпті, өрт қауіпсіздігін және көлік логистикасын қамтамасыз етумен шектелген.
10 тамызда Лопес Алматыдағы Орталық стадионда 35-тен астам елден келген қонақтармен бірге 20 мыңнан астам көрермен жинады. Алматы қаласы туризм басқармасының мәліметінше, концерттің мультипликативті әсері шамамен 5 млрд теңгені (шамамен 9,2 млн доллар) құрады, бұл туристердің билет, тұру, тамақтану және экскурсия қызметтеріне жұмсаған шығындарын қамтиды.
Айта кетейік, Дженнифер Лопестің Up All Night әлемдік туры 8 шілдеден 12 тамызға дейінгі созылды. Тур 13 елдің 20 қаласын қамтыды.
