الەۋمەتتىك مەديتسينالىق ساقتاندىرۋ قورى مىندەتتى الەۋمەتتىك مەديتسينالىق ساقتاندىرۋ قاراجاتىن قورعاۋ جۇيەسىن دايەكتى تۇردە كۇشەيتىپ، تسيفرلىق قاداعالاۋعا، تاۋەكەلگە باعدارلانعان باسقارۋعا جانە مەديتسينالىق ۇيىمدارعا قاراجات اۋدارىلعانعا دەيىن نەگىزسىز تولەمدەردىڭ الدىن الۋعا نەگىزدەلگەن قارجىلىق باقىلاۋدىڭ جاڭا مودەلىنە كوشۋدە.
بۇل جۇمىس قوردىڭ 2030 جىلعا دەيىنگى دامۋ ستراتەگياسىن ىسكە اسىراتىن جانە قازاقستاندا دەنساۋلىق ساقتاۋدى قارجىلاندىرۋدى مەملەكەتتىك باسقارۋدىڭ جاڭا مودەلىنە كوشىرۋ شارالارىنىڭ نەگىزگى باعىتتارىنىڭ ءبىرى.
باقىلاۋدى كۇشەيتۋ جانە جاۋاپكەرشىلىك بۇلتارتپاستىعى قاعيداتى
قۇقىق قورعاۋ ورگاندارى تەرگەپ جاتقان قازىرگى ەپيزودتار جۇيەنىڭ بۇرىنعى جۇمىس كەزەڭدەرىنە (2024-2025 جج.) قاتىستى. ماتەريالداردىڭ ەداۋىر بولىگىن قوردىڭ ءوزى باقىلاۋ ءىس-شارالارى بارىسىندا انىقتاپ، پروتسەستىك شەشىمدەر قابىلداۋ ءۇشىن قۇقىق قورعاۋ ورگاندارىنا جولداعان.
بۇزۋشىلىقتار ءىس جۇزىندە كورسەتىلمەگەن مەديتسينالىق كومەكتى كورسەتۋ، قىزمەت كولەمدەرىن قوسىپ جازۋ، ازاماتتاردى جالعان بەكىتۋ، پاتسيەنتتەردىڭ دەربەس دەرەكتەرىن زاڭسىز پايدالانۋ، سونداي-اق ءمامس قاراجاتىن زاڭسىز الۋدىڭ باسقا دا سحەمالارىمەن بايلانىستى.
2026 جىلدىڭ ءبىرىنشى جارتىجىلدىعىنىڭ قورىتىندىسى بويىنشا قور جالپى سوماسى 4,5 ملرد تەڭگەنى قۇرايتىن بۇزۋشىلىقتار جونىندەگى 72 ماتەريالدى قۇقىق قورعاۋ ورگاندارىنا جولدادى. ولاردى قاراۋ ناتيجەسىندە 27 قىلمىستىق ءىس تىركەلىپ، ولار بويىنشا كەلتىرىلگەن زالالدىڭ بەلگىلەنگەن مولشەرى 3,7 ملرد تەڭگەنى قۇرادى.
سالىستىرۋ ءۇشىن، 2025 جىلدىڭ تولىق كەزەڭىندە 630 ملن تەڭگە سوماسىنا 73 ماتەريال جولدانىپ، ولار بويىنشا 8 قىلمىستىق ءىس تىركەلگەن.
بۇل رەتتە انىقتالعان بۇزۋشىلىقتار كولەمىنىڭ ارتۋى تەرىس پايدالانۋ فاكتىلەرىنىڭ كوبەيگەنىن ەمەس، قوردىڭ باقىلاۋ فۋنكتسياسىنىڭ ساپالى كۇشەيگەنىن، تالدامالىق قۇرالداردىڭ جەتىلدىرىلگەنىن جانە ءاربىر انىقتالعان فاكتىنى قۇقىقتىق باعا بەرۋگە دەيىن جەتكىزۋ جۇمىسىنىڭ كۇشەيگەنىن كورسەتەدى.
قوردىڭ ۇستانىمى قاعيداتتى ءارى وزگەرىسسىز: ءمامس قاراجاتىن زاڭسىز پايدالانۋدىڭ ءاربىر راستالعان فاكتىگە وبەكتيۆتى قۇقىقتىق باعا بەرىلىپ، كىنالى تۇلعالار زاڭناماعا سايكەس جاۋاپكەرشىلىككە تارتىلۋعا، ال مەملەكەتكە كەلتىرىلگەن زالال وتەلۋگە ءتيىس.
بۇزۋشىلىقتاردى انىقتاۋدان ولاردىڭ الدىن الۋعا كوشۋ
قۇقىق قورعاۋ ورگاندارىمەن ءوزارا ءىس-قيمىلدى كۇشەيتۋمەن قاتار، قور قارجىلىق باقىلاۋ جۇمىستارىنا وزگەرىس ەنگىزۋدە.
ەگەر بۇرىن بۇزۋشىلىقتاردى انىقتاۋ كەزىندەگى نەگىزگى جۇمىس قاراجات اۋدارىلعاننان كەيىن ورىندالسا، جاڭا مودەل الدىن الۋ شارالارىن مەديتسينالىق ۇيىمعا تولەم جۇرگىزگەنگە دەيىن ورىنداۋدى كوزدەيدى.
قوردىڭ دامۋ ستراتەگياسىن ىسكە اسىرۋ شەڭبەرىندە Qalqan IT-پلاتفورماسىن، اۆتوماتتاندىرىلعان انتيفرود جۇيەسىن جانە دەرەكتەردى تالداۋدىڭ تاۋەكەلگە باعدارلانعان الگوريتمدەرىن قامتيتىن قارجىلىق باقىلاۋدىڭ بىرىڭعاي تسيفرلىق ەكوجۇيەسى ەنگىزىلۋدە.
جاڭا تسيفرلىق قۇرالدار ناقتى ۋاقىت رەجيمىندە مەديتسينالىق كومەكتىڭ قالىپتان تىس كولەمدەرىن، جاپپاي نەگىزسىز جازبالاردى، مەديتسينالىق قىزمەت جەتكىزۋشىلەردىڭ جالعان قىزمەت بەلگىلەرىن، كورسەتىلگەن قىزمەتتەر كولەمىن جاساندى تۇردە ۇلعايتۋدى جانە باسقا دا تاۋەكەل ستسەناريلەرىن انىقتاۋعا مۇمكىندىك بەرەدى.
پاتسيەنت باقىلاۋدىڭ تولىققاندى قاتىسۋشىسىنا اينالادى
جاڭا مودەلدىڭ ماڭىزدى ەلەمەنتى قوعامدىق باقىلاۋ تەتىكتەرىن دامىتۋ بولماق. ءاربىر ازامات ءوزىنىڭ اتىنا تىركەلگەن مەديتسينالىق قىزمەتتەردى جەدەل تەكسەرىپ، ءىس جۇزىندە مۇنداي كومەك كورسەتىلمەگەن جاعدايلار تۋرالى حابارلاي الادى.
مۇنداي وتىنىشتەر تەكسەرۋلەر جۇرگىزۋگە ارنالعان تاۋەكەل ينديكاتورلارىنىڭ قوسىمشا كوزى رەتىندە پايدالانىلدى.
ءمامس قاراجاتىن قورعاۋدىڭ جاڭا مودەلى
«الەۋمەتتىك مەديتسينالىق ساقتاندىرۋ قورى» كەاق باسقارما توراعاسى گۇلميرا سابدەنبەك باقىلاۋدى كۇشەيتۋ ءبىر رەتتىك ناۋقان ەمەس، دەنساۋلىق ساقتاۋداعى قارجىلىق باسقارۋدىڭ جۇيەلى رەفورماسى ەكەنىن اتاپ ءوتتى.
«قور باقىلاۋ ءتاسىلىن تۇبەگەيلى وزگەرتۋگە بەت بۇردى. ياعني، بۇزۋشىلىقتاردى كەيىن انىقتاۋدىڭ ورنىنا ولاردى الدىن الۋ شارالارىن قولعا الامىز. ءبىزدىڭ ماقساتىمىز مەديتسينالىق ۇيىمدارعا قاراجات اۋدارىلعانعا دەيىن نەگىزسىز تولەمدەردىڭ جاسالۋىنا جول بەرمەۋ. بۇل ءاربىر تەڭگەنىڭ ماقساتتى جۇمسالۋىن قامتاماسىز ەتىپ، ازاماتتاردىڭ ءمامس جۇيەسىنە سەنىمىن نىعايتۋعا مۇمكىندىك بەرەدى»، – دەپ اتاپ ءوتتى گۇلميرا سابدەنبەك.
بۇگىنگى كۇنى 5,5 ملن استام قازاقستاندىق ءمامس جارناسىن تولەپ، اۋدارىم جاسايدى. جاڭا باقىلاۋ جۇيەسى ولاردىڭ ارقايسىسىنا ءمامس قاراجاتى تەك ناقتى كورسەتىلگەن مەديتسينالىق كومەككە جۇمسالىپ، ماقساتتى باعىتتا پايدالانعانىنا قاتاڭ باقىلاۋ جاسالعانىنا سەنىمدى بولۋعا مۇمكىندىك بەرەدى.
