بۇگىن ۇلىتاۋ وبلىسىندا قازاقتىڭ ۇلى ويشىلى، كەمەڭگەر اقىن اباي قۇنانبايۇلىنىڭ 180 جىلدىق مەرەيتويىنا ارنالعان ۇلى ابايدى ۇلىقتاۋ كۇنى سالتاناتتى تۇردە اتالىپ ءوتتى. ءىس-شارا اباي ەسكەرتكىشى جانىندا ءوتتى.
مەرەكە س.قوجامقۇلوۆ اتىنداعى تەاتر ارتىستەرىنىڭ تەاترلاندىرىلعان قويىلىمىمەن باستالىپ، كورەرمەندەرگە ۇلى اقىننىڭ ءومىرى مەن مۇراسى جايلى تاعىلىمدى كورىنىس ۇسىنىلدى. ارنايى دايىندالعان الاڭدا ابايدىڭ كىتاپتارى، سۋرەتتەرى جانە شىعارماشىلىق مۇراسىنا قاتىستى كورمەلىك ەكسپوزيتسيالار كوپشىلىك نازارىنا ۇسىنىلدى.
وبلىس اكىمىنىڭ ورىنباسارى زينا اقىلبەكوۆا قۇتتىقتاۋ سوزىندە ابايدىڭ حالىق رۋحانياتىنداعى ايرىقشا ورنىن اتاپ ءوتىپ، ونىڭ وسيەت-ونەگەسى ءار ۇرپاققا جول كورسەتەتىن شامشىراق ەكەنىن جەتكىزدى. سونداي-اق، ۇلىتاۋ وبلىستىق ارداگەرلەر كەڭەسى توراعاسىنىڭ ورىنباسارى، ابايتانۋشى بەكبولات ەسەنوۆ جينالعاندارعا جۇرەك جاردى لەبىزىن ءبىلدىردى.
سالتاناتتى جيىن اياسىندا «اباي-دانا، اباي-دارا» اتتى اقىندار ءمۇشايراسىنىڭ جەڭىمپازدارى ماراپاتتالدى. باس جۇلدەنى اباي اتىنداعى مامانداندىرىلعان مەكتەپ-ينتەرناتىنىڭ ۇستازى جانات ابدىعوجين يەلەندى. جۇلدەگەرلەر ساحنادا ءوز ولەڭدەرىن وقىپ، كوپشىلىك قوشەمەتىنە بولەندى.
زيالى قاۋىم وكىلدەرى مەن تۇرعىندار اباي ەسكەرتكىشىنە گۇل شوقتارىن قويىپ، ۇلى ويشىلدىڭ رۋحىنا تاعزىم ەتتى. حاكىم ابايدىڭ تۋعان كۇنى قارساڭىندا ەسكەرتكىش ماڭىندا ونىڭ اندەرى شىرقالىپ، ولەڭدەرى وقىلدى.
ايتا كەتەيىك، «اباي كەرۋەنى» ادەبي ساپارى 4 تامىزدا جەزقازعان قالاسىندا باستالىپ، ۇلىتاۋ، جاڭاارقا اۋداندارى، قاراجال، ساتباەۆ قالالارى جانە جايرەم كەنتىندە جالعاسىن تاپتى. جوبا ماقساتى – ابايدىڭ شىعارماشىلىق مۇراسىن كەڭىنەن ناسيحاتتاپ، ۇلتتىڭ رۋحاني قۇندىلىقتارىن دارىپتەۋ.
