ۇلىتاۋ وبلىسىندا مۇعالىمدەر كۇنىنە ارنالعان «ۇستاز – ۇلتتىڭ شامشىراعى» سالتاناتتى جيىنى ءوتتى. مەرەكەلىك شاراعا وبلىس اكىمى ەسەت بايكەن قاتىسىپ، ۇستازدار قاۋىمىن كاسىبي مەرەكەسىمەن قۇتتىقتادى.
سالتاناتتى جيىندا ءبىلىم سالاسىنىڭ دامۋىنا ۇلەس قوسىپ جۇرگەن بىرقاتار پەداگوگكە مەملەكەتتىك جانە ۆەدومستۆولىق ماراپاتتار تابىستالدى. ۇستازدار «قۇرمەت» وردەنىمەن، «ەرەن ەڭبەگى ءۇشىن» مەدالىمەن، «ەڭبەك ارداگەرى»، «ىبىراي التىنسارين» مەدالدارىمەن، سونداي-اق وقۋ-اعارتۋ مينيسترلىگىنىڭ «ورتا ءبىلىم بەرۋ ءىسىنىڭ ۇزدىگى» قۇرمەت ديپلومىمەن جانە العىس حاتتارىمەن ماراپاتتالدى. سونىمەن قاتار ۇلىتاۋ وبلىسىنىڭ قۇرمەت گراموتالارى تابىستالدى.
سونداي-اق «ۇلىتاۋ ءبىلىم ۇزدىگى» نوميناتسياسىنىڭ جەڭىمپازدارىنا 1 ميلليون تەڭگەدەن سىياقى بەرىلىپ، ۇزدىك ءبىلىم بەرۋ ۇيىمدارىنا 6 ميلليون تەڭگەلىك سەرتيفيكاتتار تابىستالدى.
— ۇستاز – ۇرپاق تاربيەسى مەن ەل بولاشاعىنا تىكەلەي جاۋاپتى ەڭ ماڭىزدى ماماندىقتىڭ يەسى. بۇگىنگى ماراپات – پەداگوگتەردىڭ ەڭبەگىنە كورسەتىلگەن قۇرمەتتىڭ بەلگىسى. ءبىز الداعى ۋاقىتتا دا ۇستازداردىڭ كاسىبي دامۋىنا، ءبىلىم بەرۋ ساپاسىن ارتتىرۋعا جانە بالالارعا قولايلى ورتا قالىپتاستىرۋعا باسىمدىق بەرەمىز. وسى باعىتتا 2027 جىلدان باستاپ وبلىستىق ادىستەمەلىك ورتالىقتىڭ جۇمىسى جاڭا فورماتقا كوشىپ، «ۇلىتاۋ ۇستازى» وقۋ-ادىستەمەلىك ورتالىعى مەن ۇستازدار ءۇيىن اشۋ جوسپارلانىپ وتىر. سونىمەن قاتار پەداگوگ كادرلارعا سۇرانىستى ەسكەرە وتىرىپ، جوعارى كوللەدج مارتەبەسىن بەرۋ جانە «لوگوپەديا» باعىتى بويىنشا قولدانبالى باكالاۆريات باعدارلاماسىن ىسكە قوسۋ كوزدەلۋدە، — دەدى وبلىس اكىمى ەسەت بايكەن.
الداعى جىلى بالالاردىڭ سپورتتىق، شىعارماشىلىق جانە اسكەري-پاتريوتتىق الەۋەتىن دامىتۋعا باعىتتالعان قوسىمشا ءبىلىم بەرۋ ورتالىعى اشىلادى. سونىمەن قاتار بارلىق مەكتەپتە وقۋشىلاردىڭ بوس ۋاقىتىن ءتيىمدى ۇيىمداستىرۋعا ارنالعان Community ورتالىقتارىن ىسكە قوسۋ جوسپارلانۋدا.
مەرەكەلىك جيىن ۇستازدارعا ارنالعان ارنايى كومپوزيتسيامەن جانە ەسترادا جۇلدىزدارىنىڭ كونتسەرتتىك باعدارلاماسىمەن جالعاستى.
