مەرەكەلىك ءىس-شارا تەاترلاندىرىلعان قويىلىممەن باستالىپ، سالتاناتتى تۇردە مەملەكەتتىك تۋ اكەلىندى. قازاقستان رەسپۋبليكاسىنىڭ مەملەكەتتىك گيمنى ورىندالىپ، جينالعان جۇرتشىلىق جەڭىس رۋحىنا تاعزىم ەتتى.
ءوڭىر تۇرعىندارىن ۇلىتاۋ وبلىسىنىڭ اكىمى داستان رىسپەكوۆ قۇتتىقتاپ، ۇلى جەڭىستىڭ تاريحي ماڭىزىنا توقتالدى.
«قازاق مىسىنىڭ قارا شاڭىراعى – قارساقباي زاۋىتى سوعىس جىلدارى اسكەري ونىمدەر شىعارىپ، جەڭىستى جاقىنداتۋعا ولشەۋسىز ۇلەس قوستى. بۇل – ءبىزدىڭ ءوڭىر ءۇشىن ۇلكەن تاريح، ۇرپاقتان-ۇرپاققا جالعاساتىن ماقتانىش. قاسيەتتى ۇلىتاۋ جەرىنەن شىققان ازاماتتار مايدان دالاسىندا دا، تىلدا دا تاباندىلىق پەن وتانسۇيگىشتىكتىڭ ۇلگىسىن كورسەتتى»، – دەدى ءوڭىر باسشىسى ءوز سوزىندە.
ۇلىتاۋلىقتار مايداندا قازا تاپقان بوزداقتار مەن ەل تىنىشتىعى جولىندا جانىن قيعان ەرلەر رۋحىن ءبىر مينۋت ۇنسىزدىكپەن ەسكە الدى. قاتىسۋشىلار بابالار رۋحىنا تاعزىم ەتىپ، ماڭگىلىك الاۋعا گۇل شوقتارىن قويدى.
مەرەكەلىك شارا بارىسىندا تۇرعىندارعا ءداستۇرلى دالا اسحاناسى ۇسىنىلىپ، جەڭىس اندەرى شىرقالدى.
