تيمۋر قۇلىباەۆتىڭ Halyk قايىرىمدىلىق قورىنىڭ قولداۋىمەن جانە كاسىبي سكاۋتتاردىڭ نازارى اياسىندا ەلىمىزدىڭ ءار وڭىرىنەن كەلگەن جاس فۋتبولشىلار الاڭعا شىقتى، دەپ حابارلايدى "ادىرنا" ۇلتتىق پورتالى.
قازاقستاننىڭ تۇكپىر-تۇكپىرىنەن كەلگەن 16 اۋىلدىق كوماندا الماتىدا العاش رەت HALYK OPEN GOLDEN KIDS اتتى بالالار تۋرنيرىندە باس قوستى. بۇل – تيمۋر قۇلىباەۆتىڭ Halyk قورىنىڭ قاتىسۋىمەن جۇزەگە اسىرىلىپ جاتقان #اۋىلفۋتبول جوباسىنىڭ جاڭا كەزەڭى.
تۋرنير ەلدىڭ تۇكپىر-تۇكپىرىنەن كەلگەن جاس سپورتشىلاردى جيناپ، ناعىز فۋتبول دۋمانىنا اينالدى: الاڭداعى تارتىس، تريبۋناداعى اتا-انالاردىڭ تولقىنىسى جانە بولاشاق جۇلدىزداردى ىزدەۋگە ارنايى كەلگەن «قايرات» كلۋبىنىڭ كاسىبي سكاۋتتارىنىڭ نازارى — ءبارى دە بۇل شارانىڭ ەرەكشە ماڭىزىن ايقىنداپ تۇردى.
«باستى ماقسات – اۋىل بالالارىنا ۇلكەن الاڭدا وزدەرىن كورسەتۋگە مۇمكىندىك بەرۋ»، – دەيدى #اۋىلفۋتبول جوباسىنىڭ جەتەكشىسى سەرىك مامبەت.
«اۋىل فۋتبولى تۇيىق جول ەمەس، ۇلكەن ارەناعا باستار ترامپلين بولۋى كەرەك»، – دەپ تولىقتىردى ول.
تۋرنيرگە ارنايى كەلگەن قۇرمەتتى قوناقتاردىڭ قاتارىندا قازاق فۋتبولىنىڭ اڭىزى – قۇرالبەك ورداباەۆ پەن ۆايت تالعاەۆ بولدى. ولار ويىنداردى تاماشالاپ، جاس فۋتبولشىلارعا قولداۋ كورسەتتى.
تۋرنير قالاي ءوتتى؟
كوماندالار 4 توپقا ءبولىنىپ، ارقايسىندا 4 كوماندادان وينادى. كەيىن – پلەي-وفف، مەدال ءۇشىن تارتىس جانە ەڭ باستى – ءار ويىنشىعا جەكە نازار.
جوبا اياسىندا العاش رەت ءار ماتچتاعى ۇزدىك ويىنشىلار ارنايى ماراپاتتالدى. بارلىعى 32 ويىن ءوتىپ، ناتيجەسىندە 32 جەكە ماراپات تابىستالدى. سونداي-اق، سكاۋتتار تاڭداعان 12 ۇزدىك ويىنشىدان سيمۆولدى قۇرام جاساقتالدى. ولار دا Halyk قورىنان باعالى سىيلىقتارعا يە بولدى.
«اۋىل بالالارىنىڭ الەۋەتى زور. بۇل تەك ءسوز جۇزىندە ەمەس، ولاردىڭ جانكەشتىلىگى مەن كوزىندەگى جالىننان-اق بايقايمىز. ءار جەڭىسى – بولاشاق ۇرپاققا دەگەن ماقتانىش»، – دەدى Halyk قورىنىڭ اتقارۋشى ديرەكتورى عالىمبەك جاقسىلىقوۆ.
تۋرنير قاھارماندارى مەن جەڭىمپازدارى
• چەمپيون – «نامىس – قىزىلتوبە» (ماڭعىستاۋ وبلىسى)
• كۇمىس جۇلدە – RedSapsans (الماتى وبلىسى)
• قولا جۇلدە – «ىلە ساۋلەت» (الماتى وبلىسى)
• ەڭ جاس ويىنشى – سەيداحمەت احمەت (2014 ج.ت.)
• ءتۋرنيردىڭ «التىن دوبى» – ابزال بايمۇحان
ۇيىمداستىرۋشىلار تۋرنير جىلىنا ەكى رەت وتەتىنىن مالىمدەدى. ونىڭ ماقساتى – اۋىل بالالارىنا باپكەرلەر مەن مامانداردىڭ نازارىنا ىلىگەتىن مۇمكىندىكتەردى بارىنشا كوبەيتۋ.
ءتۋرنيردىڭ مازمۇنى مەن ماڭىزى
بۇل تۋرنير – 2023 جىلعى قاراشادا Halyk قورى مەن #اۋىلفۋتبول جوباسى اراسىندا جاسالعان مەموراندۋمنىڭ جالعاسى. قۇجات اياسىندا:
- 100 اۋىل كومانداسىن قولداۋ;
- 100 جاتتىقتىرۋشىنى وقىتۋ;
- 14 وڭىرلىك تۋرنير مەن ءبىر رەسپۋبليكالىق فينال وتكىزۋ;
- الماتى وبلىسىنىڭ قۇراما كومانداسىن جاساقتاۋ;
- #اۋىلفۋتبولAWARDS جۇلدەسىن تاعايىنداۋ جوسپارلانعان.
Halyk قورى تۋرالى
تيمۋر قۇلىباەۆتىڭ Halyk قايىرىمدىلىق قورى بۇگىنگە دەيىن 85 ميلليارد تەڭگەدەن استام قارجى ءبولىپ، 120-دان ءىرى جوبانى ىسكە اسىردى. جوبالار كەلەسى باعىتتاردى قامتيدى:
- ءبىلىم بەرۋ،
- دەنساۋلىق ساقتاۋ،
- سپورتتى دامىتۋ،
- وڭىرلىك ينفراقۇرىلىمدى جەتىلدىرۋ جانە باسقا دا سالالار.
اۋىلداعى بالالار سپورتىن قولداۋ – قور جۇمىسىنىڭ باستى باعىتتارىنىڭ ءبىرى. 2024–2025 جىلدارى اۋىل سپورتىنا ارنالعان جوبالارعا 500 ميلليون تەڭگەگە جۋىق قارجى قاراستىرىلعان.
