Timur Qūlybaevtyŋ Halyk qaiyrymdylyq qorynyŋ qoldauymen jäne käsıbi skauttardyŋ nazary aiasynda elımızdıŋ är öŋırınen kelgen jas futbolşylar alaŋǧa şyqty, dep habarlaidy "Adyrna" ūlttyq portaly.
Qazaqstannyŋ tükpır-tükpırınen kelgen 16 auyldyq komanda Almatyda alǧaş ret HALYK OPEN GOLDEN KIDS atty balalar turnirınde bas qosty. Būl – Timur Qūlybaevtyŋ Halyk qorynyŋ qatysuymen jüzege asyrylyp jatqan #AuylFutbol jobasynyŋ jaŋa kezeŋı.
Turnir eldıŋ tükpır-tükpırınen kelgen jas sportşylardy jinap, naǧyz futbol dumanyna ainaldy: alaŋdaǧy tartys, tribunadaǧy ata-analardyŋ tolqynysy jäne bolaşaq jūldyzdardy ızdeuge arnaiy kelgen «Qairat» klubynyŋ käsıbi skauttarynyŋ nazary — bärı de būl şaranyŋ erekşe maŋyzyn aiqyndap tūrdy.
«Basty maqsat – auyl balalaryna ülken alaŋda özderın körsetuge mümkındık beru», – deidı #AuylFutbol jobasynyŋ jetekşısı Serık Mambet.
«Auyl futboly tūiyq jol emes, ülken arenaǧa bastar tramplin boluy kerek», – dep tolyqtyrdy ol.
Turnirge arnaiy kelgen qūrmettı qonaqtardyŋ qatarynda qazaq futbolynyŋ aŋyzy – Qūralbek Ordabaev pen Vait Talǧaev boldy. Olar oiyndardy tamaşalap, jas futbolşylarǧa qoldau körsettı.
Turnir qalai öttı?
Komandalar 4 topqa bölınıp, ärqaisynda 4 komandadan oinady. Keiın – plei-off, medal üşın tartys jäne eŋ basty – är oiynşyǧa jeke nazar.
Joba aiasynda alǧaş ret är matchtaǧy üzdık oiynşylar arnaiy marapattaldy. Barlyǧy 32 oiyn ötıp, nätijesınde 32 jeke marapat tabystaldy. Sondai-aq, skauttar taŋdaǧan 12 üzdık oiynşydan simvoldy qūram jasaqtaldy. Olar da Halyk qorynan baǧaly syilyqtarǧa ie boldy.
«Auyl balalarynyŋ äleuetı zor. Būl tek söz jüzınde emes, olardyŋ jankeştılıgı men közındegı jalynnan-aq baiqaimyz. Är jeŋısı – bolaşaq ūrpaqqa degen maqtanyş», – dedı Halyk qorynyŋ atqaruşy direktory Ǧalymbek Jaqsylyqov.
Turnir qaharmandary men jeŋımpazdary
• Chempion – «Namys – Qyzyltöbe» (Maŋǧystau oblysy)
• Kümıs jülde – RedSapsans (Almaty oblysy)
• Qola jülde – «Ile Säulet» (Almaty oblysy)
• Eŋ jas oiynşy – Seidahmet Ahmet (2014 j.t.)
• Turnirdıŋ «Altyn doby» – Abzal Baimūhan
Ūiymdastyruşylar turnir jylyna ekı ret ötetının mälımdedı. Onyŋ maqsaty – auyl balalaryna bapkerler men mamandardyŋ nazaryna ılıgetın mümkındıkterdı barynşa köbeitu.
Turnirdıŋ mazmūny men maŋyzy
Būl turnir – 2023 jylǧy qaraşada Halyk qory men #AuylFutbol jobasy arasynda jasalǧan memorandumnyŋ jalǧasy. Qūjat aiasynda:
- 100 auyl komandasyn qoldau;
- 100 jattyqtyruşyny oqytu;
- 14 öŋırlık turnir men bır respublikalyq final ötkızu;
- Almaty oblysynyŋ qūrama komandasyn jasaqtau;
- #AuylFutbolAWARDS jüldesın taǧaiyndau josparlanǧan.
Halyk qory turaly
Timur Qūlybaevtyŋ Halyk qaiyrymdylyq qory bügınge deiın 85 milliard teŋgeden astam qarjy bölıp, 120-dan ırı jobany ıske asyrdy. Jobalar kelesı baǧyttardy qamtidy:
- bılım beru,
- densaulyq saqtau,
- sportty damytu,
- öŋırlık infraqūrylymdy jetıldıru jäne basqa da salalar.
Auyldaǧy balalar sportyn qoldau – qor jūmysynyŋ basty baǧyttarynyŋ bırı. 2024–2025 jyldary auyl sportyna arnalǧan jobalarǧa 500 million teŋgege juyq qarjy qarastyrylǧan.
