انكارا قالاسىنداعى باشكەنت ۋنيۆەرسيتەتى ورتالىق ازياداعى بەس ەلمەن، اتاپ ايتساق، وزبەكستان، قازاقستان، تۇرىكمەنستان، قىرعىزستان جانە تاجىكستانمەن بارلىق بايلانىسىن ۋاقىتشا توقتاتتى، دەپ حابارلايدى «ادىرنا» ءتىلشىسى Caliber اگەنتتىگىنە سىلتەمە جاساپ.
ۋنيۆەرسيتەت باسشىلىعى بۇل شەشىمنىڭ قابىلدانۋىنا اتالعان مەملەكەتتەردىڭ سولتۇستىك كيپر تۇرىك رەسپۋبليكاسىنىڭ (سكتر) مۇددەلەرىن ەلەمەي، كيپر رەسپۋبليكاسىمەن ساياسي قارىم-قاتىناس ورناتۋى سەبەپ بولعانىن مالىمدەدى.
POLITIK Central Asia مالىمەتىنشە، باشكەنت ۋنيۆەرسيتەتى سەناتىنىڭ كەزەكتەن تىس وتىرىسى 10 ساۋىردە وتكەن. جيىندا وزبەكستان، قازاقستان جانە تۇرىكمەنستاننىڭ نيكوسياعا ەلشىلەر تاعايىنداۋى مەن سامارقاند ءسامميتىنىڭ كۇن ءتارتىبى سىندى ماسەلەلەر قارالعان.
ۋنيۆەرسيتەت جانىنداعى كيپردى زەرتتەۋ ورتالىعىنىڭ ديرەكتورى، دوتسەنت مەحمەت بالەمەزدىڭ ايتۋىنشا، بۇل قادامدار تەك تۇركيا عانا مويىنداعان سولتۇستىك كيپر تۇرىك رەسپۋبليكاسىن ەلەمەۋ رەتىندە قابىلدانادى. سەنات بۇل جاعدايعا بايلانىستى ءوز رەنىشىن ءبىلدىرىپ، ورتالىق ازيا ەلدەرىن تۇركىلىك ىنتىماقتاستىق پرينتسيپتەرىن بۇزدى دەپ ايىپتادى.
باشكەنت ۋنيۆەرسيتەتىنىڭ مالىمدەمەسىندە 2022 جىلى سامارقاندتاعى تۇركى مەملەكەتتەرى ۇيىمىنىڭ سامميتىندە سكتر ماسەلەسىنە بايلانىستى قايشىلىقتار تۋىنداعانى ەرەكشە اتاپ وتىلگەن. باق مالىمەتىنشە، سول كەزدە قازاقستان پرەزيدەنتى قاسىم-جومارت توقاەۆ سكتر-گە باقىلاۋشى مارتەبە بەرۋگە قارسى شىقسا، وزبەكستان پرەزيدەنتى شاۆكات ميرزيوەۆ بەيتاراپ قالعان. كەيىنىرەك وزبەكستاننىڭ سول كەزدەگى سىرتقى ىستەر ءمينيسترى ۆلاديمير نوروۆ«سولتۇستىك كيپردى مويىنداۋ تۋرالى ءسوز بولۋى مۇمكىن ەمەس» دەگەن مالىمدەمە جاساعان.
باشكەنت ۋنيۆەرسيتەتى تۇركيا مەن سكتر اراسىنداعى ديپلوماتيالىق قاتىناستاردى سەپاراتيزممەن تەڭەستىرۋ لوگيكاسىن ءۇزىلدى-كەسىلدى قابىلدامايتىنىن مالىمدەدى. ءبىلىم ورداسى ورتالىق ازيانىڭ بەس ەلى سولتۇستىك كيپرگە قاتىستى ۇستانىمىن قايتا قاراماعانشا, اكادەميالىق ىنتىماقتاستىق تولىقتاي توقتاتىلاتىنىن جەتكىزدى.
باشكەنت ۋنيۆەرسيتەتى — تۇركياداعى ەڭ ءىرى جەكەمەنشىك ۋنيۆەرسيتەتتەردىڭ ءبىرى. ول 1994 جىلى قۇرىلعان. بۇل جەردە شامامەن 13–16 مىڭ ستۋدەنت ءبىلىم الادى, ولاردىڭ 3%-ى — شەتەلدىكتەر.
4 ساۋىردە ەۋروپالىق وداق پەن ورتالىق ازيا ەلدەرى ءسامميتىنىڭ قورىتىندىسى بويىنشا قول قويىلعان دەكلاراتسيادا ايماق ەلدەرى اۋماقتىق تۇتاستىق پرينتسيپتەرىن ۇستاناتىنىن راستادى. سونداي-اق ولار بۇۇ-نىڭ سكتر لەگيتيمدىلىگىن مويىندامايتىن قارارلارىن قابىلدايتىنىن ءبىلدىردى.
باشكەنت ۋنيۆەرسيتەتى سولتۇستىك كيپرگە قاتىستى ۇستانىمىنا بايلانىستى ورتالىق ازيا ەلدەرىمەن اكادەميالىق بايلانىستاردى توقتاتقان العاشقى تۇرىك ۋنيۆەرسيتەتى بولىپ وتىر.
