18 قازان كۇنى كەشكە اقش مەملەكەتتىك حاتشىسى ماركو رۋبيو سامارقان قالاسىنا باردى. بۇل تۋرالى UzA اگەنتتىگى جازدى، دەپ حابارلايدى «ادىرنا» ءتىلشىسى.
اۋەجايدا رۋبيو مەن ونىڭ جۇبايىن وزبەكستان پرەزيدەنتى اكىمشىلىگىنىڭ باسشىسى سايدا ميرزيوەۆا جانە باسقا دا رەسمي تۇلعالار قارسى العان. رۋبيو ورتالىق ازيا ەلدەرى مەن اقش اراسىنداعى C5+1 فورماتىنداعى سىرتقى ىستەر مينيسترلەرىنىڭ كەزدەسۋىنە قاتىسۋ ءۇشىن كەلگەن.
بۇل — ونىڭ ورتالىق ازياعا جاساعان العاشقى ساپارى. سامارقاندقا وزبەكستان پرەزيدەنتى شاۆكات ميرزيوەۆ تە كەلگەن. ول ماركو رۋبيومەن كەلىسسوز جۇرگىزىپ، ىسكەرلىك كەڭەستىڭ وتىرىسىنا قاتىسادى.
19 قازاندا سامارقاندتا امەريكا-وزبەكستان ىسكەرلىك جانە ينۆەستيتسيالىق كەڭەسىنىڭ ەكىنشى وتىرىسى وتەدى. كەڭەستىڭ تەڭ توراعالارى — سايدا ميرزيوەۆا مەن سەردجيو گور. UzA اگەنتتىگىنىڭ مالىمەتىنشە، شاراعا اقش-تىڭ 200-دەن استام كاسىپكەرى كەلگەن. باسىلىم مۇنى امەريكالىق بيزنەس وكىلدەرىنىڭ وزبەكستانعا دەگەن قىزىعۋشىلىعى ارتىپ كەلە جاتقانىنىڭ بەلگىسى دەپ باعالايدى.
سول كۇنى مەمحاتشىنىڭ ورتالىق ازيانىڭ 5 ەلىنىڭ سىرتقى ىستەر مينيسترىمەن C5+1 فورماتىنداعى كەزدەسۋى وتەدى. سونىمەن قاتار ماركو رۋبيو مەن وزبەكستاننىڭ سىرتقى ىستەر ءمينيسترى باحتيور سايدوۆ ەكى ەل اراسىنداعى كەڭەيتىلگەن ستراتەگيالىق ارىپتەستىك جونىندەگى ديالوگتىڭ العاشقى راۋندىن وتكىزەدى.
اقش مەملەكەتتىك حاتشىسىنىڭ ساپارى تۋرالى الدىن الا حابارلانعان بولاتىن. جالپى كەزدەسۋدەن بولەك، ماركو رۋبيو ايماقتاعى بەس ەلدىڭ — وزبەكستان، قازاقستان، تاجىكستان، تۇرىكمەنستان جانە قىرعىزستاننىڭ جوعارى لاۋازىمدى وكىلدەرىمەن ەكىجاقتى كەلىسسوزدەر جۇرگىزۋدى جوسپارلاعان.
سامارقاندتان كەيىن اقش مەملەكەتتىك حاتشىسى ۇندىستانعا اتتانادى. وندا ونى مۋمباي مەن دجامناگار قالالارىندا بىرقاتار كەزدەسۋ كۇتىپ تۇر.
C5+1 فورماتى 2015 جىلدان بەرى جۇمىس ىستەپ كەلەدى. سىرتقى ىستەر مينيسترلەرىنىڭ العاشقى كەزدەسۋى ءدال وسى سامارقاند قالاسىندا وتكەن. جۋىردا فورمات جوعارى دەڭگەيگە كوتەرىلدى. 2025 جىلعى 6 قاراشادا ۆاشينگتوندا دونالد ترامپ پەن ايماقتاعى بەس ەلدىڭ كوشباسشىلارى قاتىسقان C5+1 فورماتىنداعى ەكىنشى سامميت ءوتتى.
UzA اگەنتتىگىنىڭ باعالاۋىنشا، الەمدىك بۇقارالىق اقپارات قۇرالدارى بۇل ساپاردى ۆاشينگتوننىڭ ايماق مەملەكەتتەرىمەن ەكونوميكالىق بايلانىستاردى كەڭەيتۋگە جانە ستراتەگيالىق ارىپتەستىكتى نىعايتۋعا دەگەن ۇمتىلىسىمەن بايلانىستىرادى.
