تۇركيا ۇلتتىق ءبىلىم مينيسترلىگى تاريح ءپانى باعدارلاماسىنا تۇبەگەيلى وزگەرىستەر ەنگىزدى. وقۋلىقتارداعى "ورتالىق ازيا" تەرمينى "تۇركىستان" تەرمينىمەن اۋىستىرىلاتىن بولادى، دەپ حابارايدى "ادىرنا" ۇلتتىق پورتالى.
بۇل تۋرالى TRT تەلەراديوكومپانياسى حابارلادى.
تۇركيا پرەزيدەنتى بۇل باستامانى بولاشاق ۇرپاق بويىندا ۇلتتىق بىرەگەيلىك پەن ءپاتريوتيزمدى نىعايتۋعا باعىتتالعانىن مالىمدەدى.
"تۇرىك عاسىرى" تۋرالى كوزقاراسىمىزدى تۇركى مەملەكەتتەرى ۇيىمىنا جەتكىزە وتىرىپ، الداعى كەزەڭدى تۇرىكتەردىڭ داۋىرىنە اينالدىرۋ ءۇشىن يىق تىرەسە جۇمىس ىستەيتىن بولامىز", – دەدى باستامانى قولداعان تۇركيا پرەزيدەنتى رەجەپ تايىپ ەردوعان.
ەردوعننىڭ ايتۋىنشا، مۇنداي وزگەرىس تۇركى الەمىنىڭ بىرلىگى ءۇشىن اسا ماڭىزدى.
سونداي-اق، "تۇركىلەردىڭ وتانى" دەگەندى بىلدىرەتىن "تۇركىستان" ءسوزى ەرتە داۋىردەن بەرى قولدانىلىپ كەلەدى.
"19 عاسىردىڭ ەكىنشى جارتىسىندا ورىس شاپقىنشىلىعىنىڭ ناتيجەسىندە "تۇركىستان" اتاۋىنىڭ ورنىنا ورتالىق ازيا ۇعىمى ەنگىزىلىپ، جۇرت اراسىندا تارادى", - دەيدى تاريح فاكۋلتەتىنىڭ وقىتۋشىسى، دوتسەنت رامين سادىق.
عالىمنىڭ ايتۋىنشا، بۇل – تەك تۇركيا ءۇشىن عانا ەمەس، بۇكىل تۇركى الەمى، سونداي-اق تۇركى مەملەكەتتەرىنىڭ سەرىكتەس ەلدەرى ءۇشىن ماڭىزدى باستاما ءارى قۇندى ۇلەس.
