اقش پرەزيدەنتى دونالد ترامپتىڭ اكىمشىلىگى افروامەريكالىق ازاماتتاردىڭ ازاماتتىق قۇقىقتارى ءۇشىن كۇرەسكەن كوشباسشى مارتين ليۋتەر كينگتىڭ ولىمىنە قاتىستى تەرگەۋ ماتەريالدارى مەن قۇجاتتاردى جاريالادى. بۇل تۋرالى ۆۆس جازدى، دەپ حابارلايدى “ادىرنا”.
«امەريكالىقتار بۇل قاستاندىققا بايلانىستى فەدەرالدى ۇكىمەتتىڭ تەرگەۋىنىڭ تولىق كولەمىن كورۋ ءۇشىن 60 جىلعا جۋىق ۋاقىت كۇتتى.
ءبىز بۇل ەل تاريحىنداعى ەڭ ماڭىزدى ءارى قايعىلى وقيعانىڭ بارلىق تۇستارىن اشىق تۇردە كورسەتۋگە ۋادە بەرەمىز»، – دەدى ۇلتتىق بارلاۋ ديرەكتورى تۋلسي گاببارد مالىمدەمەسىندە.
گابباردتىڭ ايتۋىنشا، بارلىعى 230 مىڭنان استام قۇجات بەتى «ازعانتاي تۇزەتۋلەرمەن» جاريالانعان. ولار اقش ۇلتتىق مۇراعات سايتىندا قولجەتىمدى.
دونالد ترامپ پرەزيدەنتتىك قىزمەتىنە كىرىسكەن سوڭ، 1960-جىلدارى قاستاندىقپەن ولتىرىلگەن دجون ف. كەننەدي، ونىڭ ءىنىسى روبەرت ف. كەننەدي جانە مارتين ليۋتەر كينگكە قاتىستى قۇجاتتاردى قۇپياسىزداندىرۋ جونىندە بۇيرىقتار شىعارعان بولاتىن.
ايتا كەتسەك، ااماتتىق قۇقىقتار قورعاۋشىسى ءارى شىركەۋ ۋاعىزشىسى مارتين ليۋتەر كينگ 1968 جىلدىڭ 4 ساۋىرىندە تەننەسسي شتاتىنىڭ مەمفيس قالاسىندا ولتىرىلگەن. بۇل قىلمىسقا بۇعان دەيىن سوتتالعان دجەيمس ەرل رەي كىناسىن مويىنداعانىمەن، كەيىن ونى مويىنداۋعا ماجبۇرلەگەنىن مالىمدەگەن. ول 1998 جىلى تۇرمەدە قايتىس بولدى.
كينگتىڭ وتباسى دجەيمس ەرل رەيدىڭ كىنالى ەكەنىنە جانە جالعىز ءوزى قىلمىس جاساعانىنا كۇمان كەلتىرىپ كەلەدى. كينگتىڭ كوپتەگەن سەرىكتەستەرى دە رەسمي نۇسقاعا سەنبەيدى.
مارتين ليۋتەر كينگتىڭ بالالارى – مارتين ليۋتەر كينگ III جانە بەرنيس كينگ– قۇجاتتاردىڭ جاريالانۋىنا قارسى بولعان.
ء«بىز اكەمىزدىڭ مۇراسىن جوققا شىعارۋعا باعىتتالعان كەز كەلگەن ارەكەتتى ايىپتايمىز. بۇل قۇجاتتار جاريالانعان جاعدايدا، ونى سەزىممەن، ۇستامدىلىقپەن جانە وتباسىمىزدىڭ ءالى دە جالعاسىپ جاتقان قايعىسىنا قۇرمەتپەن قاراۋ قاجەت»، – دەدى ولار.
ولار كينگكە جۇرگىزىلگەن باقىلاۋدى «جەكە ومىرگە قول سۇعۋ» جانە «اقيقاتتى ادەيى بۇرمالاۋ» دەپ اتادى.
«بۇل ارەكەتتەر كينگتى قاراپايىم ازامات رەتىندە ار-نامىسى مەن ەركىندىگىنەن ايىردى»، دەلىنگەن مالىمدەمەدە.
