العاش رەت موڭعوليادا «موڭعول جىلقىشىلارى» اتتى ۇلتتىق فورۋم ءوتتى، دەپ حابارلايدى «ادىرنا» ءتىلشىسى.
ءىس-شاراعا 21 ايماق پەن سوموننان كەلگەن 800 جىلقىشى قاتىسقان. پرەزيدەنت ۋحنااگين حۋرەلسۋح موڭعول حالقىنىڭ جىلقى مادەنيەتى مەن ءداستۇرىنىڭ دامۋىنا زور ۇلەس قوسقانىن اتاپ ءوتىپ، ونى ساقتاۋ جانە الەمگە تانىتۋ ىسىندە جەتەكشى ءرول اتقارۋى ءتيىس ەكەنىن ايتتى.
مەملەكەت باسشىسى موڭعول جىلقىشىلارى بىرەگەي جىلقى شارۋاشىلىعى مۇراسىنىڭ ساقتاۋشىلارى ەكەنىن، ونىڭ ىشىندە موڭعول جىلقىسىنىڭ شىعۋ تاريحى، ونى كۇتىپ-باپتاۋ، اۋرۋلارىن ەمدەۋ، اتقا ءمىنۋدى ۇيرەتۋ، جۇيرىك اتتاردى ىرىكتەۋ جانە ات ابزەلدەرىن جاساۋ سياقتى داستۇرلەر قامتىلاتىنىن جەتكىزدى.
پرەزيدەنت زاماناۋي عىلىمي جەتىستىكتەردى پايدالانا وتىرىپ جىلقىلاردى ەمدەۋ ادىستەرىن دامىتۋ قاجەتتىگىن، سونداي-اق عالىمدارمەن تىعىز ىنتىماقتاستىق ورناتۋدىڭ ماڭىزىن ايتتى. سونىمەن قاتار ول جىلقى مۇراسىن ءارى قاراي جەتىلدىرۋ جانە ونى بولاشاق ۇرپاققا جەتكىزۋ ۇلكەن جاۋاپكەرشىلىك ەكەنىن ەرەكشە اتاپ ءوتتى. ودان بولەك، باپكەرلەر مەن شاباندوزداردىڭ ەتيكاسى مەن ادالدىعى ۇلتتىق «ناادام» مەرەكەسىن ءادىل ءارى ابىرويلى ۇيىمداستىرۋدا جانە ونىڭ ءداستۇرىن ساقتاۋدا ماڭىزدى ءرول اتقاراتىنىن جەتكىزدى.
الەمدەگى شامامەن 60 ميلليون جىلقىنىڭ 9 پايىزى، ياعني 5 ميلليوننان استامى موڭعوليادا شوعىرلانعان. ەل جىلقى سانى بويىنشا الەمدە ءتورتىنشى ورىندا، ال حالىق سانىنا شاققانداعى جىلقى ۇلەسى بويىنشا ءبىرىنشى ورىندا تۇر.
وتكەن جىلى بىرىككەن ۇلتتار ۇيىمىنىڭ باس اسسامبلەياسى پرەزيدەنت ۋحنااگين حۋرەلسۋحتىڭ بۇكىلالەمدىك جىلقى كۇنىن بەلگىلەۋ جونىندەگى باستاماسىن قولداپ، بۇل شەشىم جىلقىنىڭ ادامزات تاريحىنداعى ماڭىزىنىڭ جاھاندىق دەڭگەيدە مويىندالعانىن كورسەتتى. وسىعان بايلانىستى الەم ەلدەرى 11 شىلدەدە، موڭعول ۇلتتىق «ناادام» مەرەكەسى كۇندەرى بۇكىلالەمدىك جىلقى كۇنىن اتاپ وتەتىن بولادى.
2013 جىلى ۇلان-باتىر ماڭىنداعى حوي دولوون حۋداگ ايماعىندا 10 مىڭ شاباندوزدىڭ شەرۋى جانە 4 مىڭ جۇيرىك ات قاتىسقان جارىستار ءوتىپ، گيننەستىڭ رەكوردتار كىتابىنا ەنگىزىلگەن ەدى.
فورۋمدا «بۇكىلالەمدىك جىلقى كۇنى – موڭعوليا باستاماسى»، «جىلقىشىلاردىڭ الدىندا تۇرعان ماسەلەلەر جانە ولاردى شەشۋ جولدارى»، «جىلقى تۇقىمىن ساقتاۋ، اسىلداندىرۋ جانە بايگە سپورتىن دامىتۋ»، «مال شارۋاشىلىعىنا ارنالعان ەكولوگيالىق 8 ءتاسىل مەن شەشىم»، «مورين حۋر ونەرىن جىلقى مادەنيەتىمەن ۇشتاستىرۋ» جانە «جىلقىلاردى ەمدەۋ ادىستەرى» تاقىرىپتارىندا باياندامالار جاسالىپ، پىكىرتالاستار ءوتتى.
