«قازاقستان حالقىنا» قوعامدىق قورى مەن ءبىلىم بەرۋ سالاسىن تۇراقتى دامىتۋ قورىنىڭ قولداۋىمەن جۇزەگە اسىرىلىپ جاتقان «قاراعاندى وبلىسىنداعى قوسىمشا ءبىلىم بەرۋ ۇيىمدارىندا STEM-وقىتۋدى ەنگىزۋ» جوباسى ايماقتىڭ ءبىلىم بەرۋ جۇيەسىنە جاڭا سەرپىن بەردى.
اتالعان جوبا اياسىندا قاراعاندى وبلىسىنىڭ 7 قوسىمشا ءبىلىم بەرۋ ۇيىمى زاماناۋي قۇرال-جابدىقتارمەن جابدىقتالىپ، بالالارعا عىلىم مەن تەحنولوگيانىڭ تىڭ باعىتتارى قولجەتىمدى بولدى.
جوبانىڭ ناتيجەسىندە:
35 ۇيىرمە جاڭعىرتىلىپ، ماتەريالدىق-تەحنيكالىق بازاسى جاڭارتىلدى;
21 جاڭا ۇيىرمە اشىلىپ، وقۋشىلارعا تىڭ باعىتتار ۇسىنىلدى;
1000-نان استام بالا زاماناۋي ءبىلىم بەرۋ فورماتىمەن قامتىلدى;
روبوتوتەحنيكا، 3D مودەلدەۋ، جاساندى ينتەللەكت، ۆيرتۋالدى شىندىق (VR), تەلەستۋديا سياقتى باعىتتار ەنگىزىلدى;
پەداگوگتەر ارنايى قايتا دايارلاۋ كۋرستارىنان ءوتىپ، ادىستەمەلىك قولداۋعا يە بولۋدا.
جوبا تەمىرتاۋ، شاحتينسك، ساران قالالارىن، سونداي-اق اباي جانە قارقارالى اۋداندارىن قامتىدى.
ءبىلىم بەرۋ سالاسىن تۇراقتى دامىتۋ قورى قامقورشىلىق كەڭەسىنىڭ ءتورايىمى، ءبىلىم سالاسىنىڭ ارداگەرى كۇلاش نوعاتايقىزى ءشامشيدينوۆا ارنايى جۇمىس ساپارىمەن تەمىرتاۋ، ساران جانە شاحتينسك قالالارىندا بولىپ، STEM جوباسىنىڭ جۇزەگە اسىرىلۋ بارىسىمەن تانىستى. ساپار بارىسىندا ول جاڭعىرتىلعان زەرتحانالار مەن شەبەرحانالاردى ارالاپ، وقۋشىلاردىڭ عىلىمي-تەحنيكالىق جوبالارىن تاماشالادى. سونىمەن قاتار، پەداگوگيكالىق ۇجىممەن كەزدەسىپ، ولاردىڭ پىكىرلەرىن تىڭداپ، الداعى جوسپارلارىمەن تانىستى.
بۇل باستاما اۋىلدىق جانە قالالىق وقۋشىلارعا ساپالى بىلىمگە تەڭ قولجەتىمدىلىك بەرىپ، شىعارماشىلىق الەۋەتىن ارتتىرۋعا جول اشتى. جوبانىڭ باستى ماقساتى – بالالاردىڭ بولاشاققا دەگەن سەنىمىن نىعايتىپ، ولاردى عىلىم مەن تەحنولوگياعا باۋلۋ ارقىلى باسەكەگە قابىلەتتى تۇلعا رەتىندە تاربيەلەۋ.
ۇقساس جاڭالىقتار
