قاراعاندى قالاسىندا كوشەدەگى ءدامحانا كيوسكىسىندە گاز باللونى جارىلىپ، سالدارىنان ءتورت ادام زارداپ شەكتى. بۇل تۋرالى قاراعاندى وبلىستىق توتەنشە جاعدايلار دەپارتامەنتى مالىمدەدى، دەپ حابارلايدى "ادىرنا".
وقيعا 22 قاڭتار كۇنى ەرمەكوۆ كوشەسىندە بولعان. توتەنشە جاعدايلار دەپارتامەنتىنىڭ مالىمەتىنشە، كيوسك ىشىندە تۇرعان كولەمى 17 ليترلىك گاز باللونىنداعى گاز-اۋا قوسپاسى جارىلىپ، ارتىنان ءورت شىققان.
«وقيعا سالدارىنان كۇيىك بەلگىلەرى بار ءتورت ادام زارداپ شەكتى. ولاردىڭ بارلىعى مەديتسينالىق مەكەمەگە جەتكىزىلدى. وقيعانىڭ ءمان-جايى انىقتالىپ جاتىر»، – دەپ حابارلادى قاراعاندى وبلىستىق تجد ءباسپاسوز قىزمەتى.
وقيعا سالدارىنان ساۋدا نىسانىنىڭ ىشكى جانە سىرتقى قاپتاماسى، جيھازدارى مەن تۇرمىستىق تەحنيكاسى زاقىمداندى. جالىننىڭ تارالۋ اۋماعى شامامەن 30 شارشى مەتردى قۇرادى. قاۋىپتىڭ ۇلعايۋىنا جول بەرمەۋ ءۇشىن كولەمى 27 ليتر بولاتىن تاعى ەكى گاز باللونى جەدەل تۇردە سىرتقا شىعارىلعان.
دەنساۋلىق ساقتاۋ باسقارماسىنىڭ اقپارىنشا، ءۇش پاتسيەنت جانساقتاۋ بولىمىنە جاتقىزىلدى. ولاردىڭ جاعدايى اۋىر دەپ باعالانۋدا. تاعى ءبىر ناۋقاس ورتاشا كۇيىك شالۋمەن ءتۇسىپ، كومبۋستيولوگيا بولىمىندە ەم الادى.
