قاراعاندىدا ۇلتارالىق ارازدىق قوزدىردى دەگەن كۇدىكپەن 22 جاستاعى اليكا مۇحاماديەۆا قاماۋعا الىندى. ول الەۋمەتتىك جەلىدە قازاقتاردى «مامبەت»، «قالبيت»، «قازاقشاسويلەشنيك» دەپ قورلاعان. بۇل تۋرالى قاراعاندى پوليتسيا دەپارتامەنتى مالىمدەدى، دەپ حابارلايدى “ادىرنا”.
قاراعاندى وبلىسىنىڭ پوليتسيا دەپارتامەنتى الەۋمەتتىك جەلىلەردى باقىلاۋ بارىسىندا الەۋمەتتىك جەلى قولدانۋشىسى تاراپىنان ۇلتتىق ارازدىقتى قوزدىرۋ فاكتىسىن انىقتاعان. بۇل دەرەك بويىنشا قر قك 174-بابىنىڭ 1-بولىگى بويىنشا قىلمىستىق ءىس تىركەلىپ، كۇدىكتى ۋاقىتشا ۇستاۋ يزولياتورىنا قامالدى.
تەرگەۋ بارىسىندا 22 جاستاعى قاراعاندىلىق قىز «Theads» الەۋمەتتىك جەلىسىندە ۇلتارالىق ارازدىق بەلگىلەرى بار جازبا جاريالاعانى انىقتالدى. تەرگەۋ ورگاندارى كۇدىكتىنىڭ ەل اۋماعىنان شىعىپ كەتپەك نيەتى بارىن انىقتاپ، ونى قاماۋعا الۋ تۋرالى ءوتىنىش ءبىلدىردى.
22 شىلدە كۇنى قاراعاندى قالاسىنىڭ تەرگەۋ سوتى اتالعان ءوتىنىشتى قاناعاتتاندىرىپ، تەرگەۋ اياقتالعانعا دەيىن ەكى اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى.
اتالعان ءىس بويىنشا سوتقا دەيىنگى تەرگەۋ جالعاسۋدا. قاجەتتى ساراپتامالار تاعايىندالدى. تەرگەۋ ناتيجەسى بويىنشا زاڭدى پروتسەسسۋالدىق شەشىم قابىلداناتىن بولادى.
ەسكە سالايىق، كۇدىكتى Threads جەلىسىندەگى ءبىر جازبانىڭ استىنداعى پىكىرلەردە قىز قازاقتاردى «مامبەت»، «قالبيت»، «قازاقشاسويلەشنيك» دەپ اتاعان، ال مۇسىلمانداردى «شوشقا» دەپ قورلاعان بولاتىن. بۇل پىكىرلەر جەلىدە بىردەن ۇلكەن رەزونانس تۋدىرىپ، اشۋعا بۋلىققان قولدانۋشىلار ونى ۇلتارازدىق ارازدىق قوزدىرعانى ءۇشىن جاۋاپقا تارتۋعا شاقىردى. قىزعا قاتىستى پوليتسياعا ارىز ءتۇستى.
