قاراعاندىدا جولاۋشى اۆتوبۋستان قۇلاپ كەتتى، دەپ حابارلايدى "ادىرنا" ۇلتتىق پورتالى.
وقيعانىڭ بەينەسى الەۋمەتتىك جەلىدە تاراعان. كادرلاردان جولاۋشىنىڭ ءجۇرىپ بارا جاتقان №43 باعىتتاعى اۆتوبۋستان قۇلاعانى انىق كورىنەدى.
بەينەجازبادا ەر ادامنىڭ اۆتوبۋسقا ءمىنىپ، سالون ىشىنە وتپەي، ەسىك ماڭىندا تۇرعانى بايقالادى. ءجۇرىپ بارا جاتقان كولىكتە ەسىكتەر تولىق جابىلماي، قايتا اشىلعان. الدىن الا بولجام بويىنشا، جولاۋشىنىڭ ارقاسىنداعى سومكەسى ەسىكتەردىڭ جابىلۋىنا كەدەرگى كەلتىرگەن. سوعان قاراماستان اۆتوبۋس قوزعالىستى باستاپ، جولاۋشى جولعا قۇلاپ تۇسكەن. كەيىن كولىك توقتاپ، باسقا جولاۋشىلار كومەك كورسەتۋ ءۇشىن سىرتقا شىققان.
قاراعاندى قالاسى اكىمدىگى وقيعانىڭ بولعانىن راستاعان. زارداپ شەككەن ازاماتقا مەديتسينالىق كومەك كورسەتىلىپ، قازىرگى ۋاقىتتا اۋرۋحانادا جاتىر. دارىگەرلەر ونىڭ جاعدايىن تۇراقتى دەپ باعالاپ وتىر.
قالا اكىمدىگىنىڭ مالىمەتىنشە، جۇرگىزۋشى ەسىكتەردىڭ تولىق جابىلعانىنا كوز جەتكىزبەي، قوزعالىستى باستاعان. قازىرگى تاڭدا اۆتوبۋستاعى بەينەباقىلاۋ كامەرالارىنىڭ جازبالارى الىنىپ، وقيعانىڭ بارلىق ءمان-جايى انىقتالۋدا.
