الماتى قالاسىنداعى جالايىر كوشەسىندە ورنالاسقان «اسىل ۇيا» تۇرعىن ءۇي كەشەنىنىڭ تۇرعىندارى بىرقاتار زاڭبۇزۋشىلىقتار مەن ساپاسىز قىزمەت كورسەتۋ ماسەلەلەرىنە بايلانىستى دابىل قاعۋدا. كەشەندى 2023 جىلى سالعان AKAS قۇرىلىس كومپانياسى بەرگەن ۋادەلەردىڭ كوپشىلىگى ورىندالماعانىن ايتقان تۇرعىندار 19 شىلدە كۇنى اشىق جينالىس وتكىزىپ، قوعام مەن ۋاكىلەتتى ورگانداردىڭ نازارىن اۋداردى.
«ۋادە ەتىلگەن «كومفورت» قاعازدا قالعان»
پاتەرلەر “كومفورت” كلاسىنا ساي دەپ ساتىلعانىمەن، تۇرعىندار بۇگىنگى جاعداي بۇعان مۇلدە سايكەس كەلمەيتىنىن العا تارتادى. قۇرىلىس كومپانياسى كەشەن اۋماعى قورشالاتىنى تۋرالى ۋادە بەرگەنىمەن، بۇل جۇمىستار ءالى كۇنگە دەيىن جۇزەگە اسپاعان.
«بۇل تۇرعىن ءۇي 2 جىل بۇرىن بەرىلگەن. بىراق قازىر سىرتقى ەسىكتەرى بۇزىلىپ تۇر. ساپاسى ناشار. 6 كورپۋسقا ءبىر عانا قوقىس تاستايتىن ورىن بار. ول سىرتىنا دەيىن توگىلىپ جاتادى. ۋادە ەتىلگەن “كومفورت” - قاعازدا عانا. كسك (پيك – پاتەر يەلەرى كووپەراتيۆى) قىزمەتى دە جۇمىسىن دۇرىس ورىندامايدى. بىزدەن اقشاسىن الادى، بىراق باسشىسىن مۇلدە كورگەن جوقپىز»، - دەيدى تۇرعىن ساۋلە وماروۆا.
ونىڭ ايتۋىنشا، كەشەن تۇرعىندارى پيك قىزمەتىنىڭ ۇكىمەت بالانسىنا وتكىزىلگەنىن جانە جاڭا باسقارۋشى كومپانيانىڭ كەلۋىن تالاپ ەتىپ وتىر.
«سۋ دا، جارىق تا قىمبات. ءبىز مەكەمەلەر سەكىلدى كوممەرتسيالىق باعادا تولەيمىز. ءبارىن ۋاقىتىندا تولەگەنىمىزبەن، تالاپقا مۇلدە ساي ەمەس. وسى كۇنگە دەيىن كسك بىردە-ءبىر رەت ەسەپ بەرگەن جوق. تەك اقشا جيناۋدى عانا ءبىلدى”، - دەيدى ساۋلە وماروۆا.
كەشەندى باسقارۋ قىزمەتى تۇرعىنداردىڭ سىن تەزىنە ىلىگىپ كەلەدى. تۇرعىنداردىڭ سوزىنشە، اۋلالار مەن ارىقتار قوقىسقا تولىپ جاتىر، كوگالدارعا سۋ قۇيۋ جۇيەلى تۇردە جۇرگىزىلمەيدى. سانيتارلىق تالاپتار ساقتالمايدى – مىسالى، كاناليزاتسيا اپاتتارىنان كەيىن جەرتولەلەردە دەزينفەكتسيا جاسالماعان. بۇل تۇرعىنداردىڭ دەنساۋلىعىنا تىكەلەي قاۋىپ ءتوندىرۋى مۇمكىن.
“بىزدە كسك قىزمەتى مىندەتىن دۇرىس اتقارمايدى. ايماق اباتتاندىرىلماعان، ونى قاراپ تا جاتقان جوق. گازوندار مەن اعاشتارعا سۋ قۇيىلمايدى. ءدالىزدى جۋمايدى. بۇگىن عانا قۇرىلىس كومپانياسى ءۇش اي وتكەن سوڭ بالانستى ۇكىمەتكە اۋىستىراتىندارىن ايتىپ ۋادە بەرىپ وتىر. بۇل ۋادە بۇرىن دا بەرىلگەن”، - دەيدى تۇرعىن بوتاگوز ەسەنعاليقىزى.
تۇرعىندار كوممۋنالدىق تولەمدەردىڭ دۇرىستىعىن دا كۇمانمەن قارايدى. تاريفتەردىڭ ناقتى ەسەبى جوق، ال شىعىندار تۋرالى اقپارات تۇرعىندارعا اشىق ۇسىنىلمايدى. ال سەرۆيستىك قىزمەت ەتۋشى مەكەمە (پيك) باسشىسى پارحات بازاربايۇلى تۇرعىنداردىڭ 6 ميلليوننان استام قارىزى بار ەكەنىن ايتادى. الايدا، ونىڭ ناقتى ەسەبىن بەرمەگەن.
ەندى تۇرعىندار ءبىراۋىزدان كەلىسىپ، سەرۆيستىك قىزمەت ەتۋشى مەكەمەنى اۋىستىرۋدا. دەگەنمەن، بۇرىنعى مەكەمە بۇلدىرگەن ىستەرىن جوندەپ، ناقتى ەسەپ بەرىپ، زاڭ الدىندا جاۋاپ بەرۋىن تالاپ ەتىپ وتىر.
قاۋىپسىزدىك پەن بەينەباقىلاۋ كوڭىل كونشىتپەيدى
كەشەندە ورناتىلعان بەينەباقىلاۋ جۇيەسى تەك كىرەبەرىستەرمەن شەكتەلگەن. ليفتتەر مەن جوعارعى قاباتتاردا كامەرالار مۇلدە جوق. بۇل جاعداي جۋىردا ورىن العان ۇرلىق وقيعالارىنان كەيىن ايقىن بايقالعان.
«بىرنەشە ۆەلوسيپەد ۇرلاندى، كولىككە زاقىم كەلتىرىلدى. بىراق ساپاسىز بەينەجازبالاردان قىلمىسكەرلەر انىقتالمادى. كۇزەتكە قاتىستى قۇرىلىس كومپانياسى ۋادە بەرگەن، بىراق ەشتەڭە جاسالمادى»، - دەيدى تۇرعىندار.
AKAS كومپانياسى ۋادە ەتكەن كۇزەت تە ىسكە قوسىلماعان. اتالعان قۇرىلىس كومپانياسىنىڭ سەنىمدى وكىلى اقپان ءامىرجاننىڭ كولىككە ارنالعان توسقاۋىل مەن كۇزەتتى تۇرعاندار اقشا جيناپ، وزدەرى ورناتۋى كەرەگىن ايتادى.
سونىمەن قاتار، جەرتولە جايلارىنىڭ ساتىلىمعا شىعارىلۋى دا نارازىلىق تۋدىردى. تۇرعىنداردىڭ ايتۋىنشا، بۇل نىساندار زاڭ بويىنشا تۇرعىنداردىڭ ورتاق مەنشىگى بولىپ ەسەپتەلۋى ءتيىس. ال قۇرىلىس كومپانياسى جوبا بويىنشا، جەرتولەدەگى ورىندار ساتىلاتىنىن ايتتى.
ودان بولەك، تۇرعىن ءۇي كەشەنى ءالى كۇنگە دەيىن قالا بالانسىنا بەرىلمەگەن. بۇل جاعداي تۇرعىنداردىڭ قۇقىقتىق مارتەبەسىن كۇماندى ەتىپ، قانداي دا ءبىر ماسەلە تۋىنداعان جاعدايدا جاۋاپتى تاراپتى انىقتاۋدى قيىنداتىپ وتىر.
جوعارى دا ايتىلعانداي، قۇرىلىس كومپانياسى بۇل ماسەلەنى شەشىپ بەرمەك.
ء«بىز بۇل پروبلەمالارمەن بىرنەشە رەت اكىمدىككە، باسقارۋشى كومپانياعا جۇگىندىك. الايدا، ناقتى جاۋاپ تا، ناتيجە دە جوق. ءبىز ەندى بۇل جاعدايدى جاريا ەتىپ، ماسەلەنىڭ شەشىمىن قوعام بولىپ تالاپ ەتىپ وتىرمىز”، - دەيدى تۇرعىندار.
دانا نۇرمۇحانبەت
«ادىرنا» ۇلتتىق پورتالى
دەپۋتات تۇرلىحانوۆ ورتانشى ۇلىنىڭ ايەلگە قول كوتەرۋىنە وراي قىزمەتتەن كەتەر-كەتپەسىن ايتپادى (ۆيدەو)
