جاپونيانىڭ پرەمەر-ءمينيسترى سيگەرۋ يسيبا ۇكىمەتكە جاقىندا سايلانعان 15 دەپۋتاتقا امبەباپ دۇكەندەردە ساۋدا جاساۋ ءۇشىن 100 مىڭ يەننىڭ سەرتيفيكاتتارىن تاراتقان بولاتىن. ونىڭ بۇل ارەكەتى داۋعا ۇشىرادى، دەپ حابارلايدى “ادىرنا” ۇلتتىق پورتالى Associated Press سايتىنا سىلتەپ.
يسيبانىڭ كومەكشىسى پرەمر-ءمينيستردىڭ جەكە كەشىنە قاتىساتىن جاڭا دەپۋتاتتارعا سەرتيفيكاتتاردى تابىس ەتكەن. بۇل ۆاۋچەرلەردى جاپون امبەباپ دۇكەندەرىندە ساتىپ الۋ ءۇشىن پايدالانۋعا بولادى. وپپوزيتسيا مەن يسيبانىڭ كەيبىر پارتيالاستارى ونىڭ وتستاۆكاسىن تالاپ ەتۋدە. ولار مۇنداي سىيلىقتاردى قاجەتسىز ءارى قوعامنىڭ كوڭىل-كۇيىن ەسكەرمەيتىن ارەكەت رەتىندە باعالاپ وتىر.
وتكەن جىلعى سايلاۋدا لدپ كوپتەگەن مانداتتاردان ايىرىلدى، سەبەبى ولار سالىق دەكلاراتسياسىنا ەنگىزىلمەگەن كولەڭكەلى قارجىلىق قورلارمەن بايلانىستى داۋعا ۇشىرادى. ءوز كەزەگىندە يسيبا ەشقانداي زاڭ بۇزباعانىن جانە وتستاۆكاعا كەتۋدى ويلامايتىنىن ايتتى. ول سەرتيفيكاتتاردى تەك دەپۋتاتتارعا ولاردىڭ جۇمىسىنا العىس رەتىندە بەرگەنىن جانە بۇل سىيلىقتىڭ جەمقورلىققا قاتىسى جوق ەكەنىن العا تارتتى. الايدا، سىنشىلار ونىڭ اقتالۋىنا سەنبەيدى.
لدپ پارلامەنتتەگى باسىمدىعىن جوعالتتى، پارتيانىڭ كوپتەگەن مۇشەسى يسيبادان قۇتىلعىسى كەلەدى. ولاردىڭ ءبىرى شودزي نيشيدا ەگەر يسيبا كوشباسشى بولىپ قالا بەرسە، پارتيا شىلدە ايىندا وتەتىن سايلاۋدا جەڭىسكە جەتە المايتىنىن ايتتى.
