نازارباەۆ پەن ونىڭ اۋلەتىنە، قولىندا بيلىگى بار شەنەۋنىكتەرگە ولەڭ ارناپ تانىلعان اقىن بالتابەك نۇرعاليەۆ oرىس تىلىنە ارناپ ولەڭ جازدى. ولەڭىن ول Facebook پاراقشاسىنا جاريالادى، دەپ حابارلايدى “ادىرنا” ءتىلشىسى.
ول ولەڭنىڭ اۋەلى ورىسشا نۇسقاسىن جاريالاپ، كەيىن كوپشىلىكتىڭ پىكىرىنەن كەيىن ول ولەڭىنىڭ قازاقشا نۇسقاسىن ۇسىندى.
ورىس ءتىلىم، جاساي بەر، ورىس ءتىلىم،
مەن ءوزىڭدى بىلۋگە بورىشتىمىن.
ورىس ءتىلىن بىلمەسەم ەگەردە مەن،
تۇسىنبەس ەم ومىردە كوپ ءىس ءتۇبىن.
ورىس ءتىلىم — قاناتىم قالىقتاعان،
ورىس تىلدە سويلەسەم، شابىتتانام.
ورىس ءتىلى — كوركەم ءتىل، ادەمى ءتىل،
ۇلىلىعىن ايتۋدان جالىقپاعام.
ورىس تىلدە ءان ايتام، تىيىم سالما،
ءوزىم بىلەم مەن وعان سىيىنسام دا.
ورىس ءتىلى — جانىمنىڭ شامشىراعى،
ورىس تىلمەن شەشىلەر قيىن شارۋا.
ورىس ءتىلسىز ۇقپاسپىن زامانداردى،
الەمدەگى حاتتاردى، حابارلاردى.
سۇيۋگە دە مىندەتكەر ەمەسپىن مەن،
ورىس ءتىلىن سۇيمەيتىن ادامداردى.
اقىننىڭ بۇل ولەڭىنە كوپتىڭ كوڭىلىنەن شىقپادى. ورىس ءتىلىن ماقتاپ جازعان ولەڭىنە جاعىمسىز پىكىر كوپ جازىلۋدا.
«ەلدى قۇرتاتىن، ساتقىندىق جاسايتىن وسىنداي سورلىلار!»،«مىناۋىڭ تازا جىندى ەكەن عوي»، «ورىس ءتىلىن دامىتۋعا اقشا بولىنە مە؟»، ، «ساتقىندىقتا دا شەك بولمايدى»،«بالتابەك، ورىس ءتىلىن سونشالىقتى سۇيسەڭ رەسەيگە كوشسەي»، - دەپ جازدى كوپشىلىك.
