2025-2026 وقۋ جىلىنا گيدروگەولوگيا جانە گيدرولوگيا سياقتى پانارالىق ماماندىقتاردى ەسەپتەمەگەندە بارلىعى 1052 گرانت ءبولىندى. بۇل تۋرالى قر سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى "ادىرنا".
ء باسپاسوز قىزمەتىنىڭ حابارلاۋىنشا، ءبىر جىل بۇرىن قازاقستاننىڭ جوعارى وقۋ ورىندارىندا سۋ شارۋاشىلىعى ماماندىقتارىنا 618 گرانت بولىنگەن بولاتىن. سۋ شارۋاشىلىعى سالاسىنا ماماندار دايارلايتىن جوعارى وقۋ ورىندارىنىڭ سانى دا ارتىپ كەلەدى. جاڭا وقۋ جىلىنان باستاپ جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى العاش رەت «گيدرومەليوراتسيا» ماماندىعى بويىنشا ستۋدەنتتەردى قابىلداۋدى جوسپارلاپ وتىر.
بيىل سۋ سالاسىندا وندىرىستىك تاجىريبەدەن وتكەن ستۋدەنتتەردىڭ سانى ءتورت ەسە وسكەن. بىلتىر تاجىريبەدەن وتكەن ستۋدەنتتەر سانى 82 بولسا، بيىل بۇل كورسەتكىش 339-عا جەتتى.
«مەملەكەت باسشىسى سۋ شارۋاشىلىعى سالاسىن جاڭا، بىلىكتى كادرلارمەن قامتاماسىز ەتۋ جونىندە ناقتى مىندەت قويدى. گرانتتار سانىنىڭ ارتۋى – وسى باعىتتاعى ماڭىزدى قادام. سونىمەن قاتار سۋ رەسۋرستارى جانە يرريگاتسيا مينيسترلىگى سۋ شارۋاشىلىعى ماماندىقتارىنا دەگەن قىزىعۋشىلىقتى ارتتىرۋ بويىنشا بىرقاتار شارانى ازىرلەپ، ىسكە اسىرىپ جاتىر. ولاردىڭ قاتارىندا ەڭبەكاقىنى كوتەرۋ ماسەلەسى دە بار»، – دەدى سۋ رەسۋرستارى جانە يرريگاتسيا مينيسترلىگىنىڭ عىلىم جانە يننوۆاتسيالار دەپارتامەنتىنىڭ ديرەكتورى لاززات ءجۇسىپوۆا.
