قاراعاندى وبلىسىندا وقۋشىلار سانى 5 مىڭعا ارتتى

1230

قاراعاندى وبلىسىندا 209 مىڭ وقۋشى ءۇشىن جاڭا وقۋ جىلى ءداستۇرلى فورماتتا باستالماق. وتكەن جىلمەن سالىستىرعاندا ولاردىڭ سانى 5000-عا ارتىپ وتىر. ءبىرىنشى قىركۇيەكتە  20 800 ءبىرىنشى سىنىپ وقۋشىسى العاش رەت پارتاعا وتىرادى، دەپ حابارلايدى "ادىرنا" ۇلتتىق پورتالىنىڭ ءتىلشىسى.

وبلىس اكىمىنىڭ ورىنباسارى ابزال نۇكەنوۆتىڭ توراعالىعىمەن كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى تۇراقتى جۇمىس ىستەيتىن وبلىستىق كوميسسيا وتىرىسىندا جاڭا وقۋ جىلىنا دايىندىق ماسەلەلەرى تالقىلاندى. كەزدەسۋ ونلاين رەجيمدە ءوتتى.

بۇگىنگى كۇنى قاراعاندى وبلىسىندا  489 قالالىق جانە اۋىلدىق مەكتەپ جۇمىس ىستەيدى. كوميسسيا وتىرىسىندا شاعىن جيناقتى مەكتەپتەردىڭ جۇمىس ىستەۋىنە قاتىستى بىرقاتار ماسەلەلەر كوتەرىلدى.  مەكتەپتەرى 5-10 بالادان اسپايتىن اۋداندار بار ەكەندىگى، كەيبىر اۋىلدىق مەكتەپتەردە بالالاردىڭ جەتىسپەۋشىلىگى بايقالدى. وسىعان سايكەس، ءبىلىم بەرۋ ساپاسى تۋرالى ماسەلە تۋىنداپ،  بىرقاتار وبەكتيۆتى سەبەپتەرگە بايلانىستى كەيبىر مەكتەپتەر قايتا قۇرىلدى. باستى نەگىز - قر ءبىلىم جانە عىلىم مينيسترلىگى بەلگىلەگەن بالالار سانى بويىنشا نورماتيۆتەرگە سايكەس كەلمەۋ.

مەكتەپتەر جابىلعان ءاربىر ەلدى مەكەن بويىنشا بالالاردىڭ وقۋىن قايدا جالعاستىراتىنى تۋرالى ماسەلە شەشىلدى. ولاردى جاقىن ماڭداعى باسقا اۋىلعا اپارىپ جانە قايتادان ۇيگە الىپ باراتىن بولادى، ءبىر بولىگىن ينتەرناتتارعا ورنالاستىرادى، دەپ حابارلادى ءبىلىم باسقارماسىنىڭ باسشىسى گۇلسىم قوجاحمەتوۆا.

ابزال نۇكەنوۆ تاسىمالداۋدا ەشقانداي پروبلەمالار بولماۋى كەرەك ەكەنىن باسا ايتتى. ول بالالاردىڭ ساپالى ءبىلىم الۋى كەرەكتىگىن، شاعىن جيناقتى مەكتەپتەردە كادر تاپشىلىعى ماسەلەسى تۋىنداعانىن اتاپ ءوتتى.

بۇل ءماجبۇرلى شارا بولدى. ءبىز بالالاردىڭ بولاشاعى تۋرالى ويلانۋىمىز كەرەك، ولار ەرتەڭ ءبىلىمدى بولىپ شىعىپ،  جوو مەن كوللەدجدەرگە ءتۇسىپ، ماماندىق الۋى ءتيىس. بارلىق ماسەلەلەردى بالالاردىڭ مۇددەلەرىن ەسكەرە وتىرىپ شەشۋ كەرەك جانە ولاردىڭ قۇقىقتارىنىڭ قورعالۋىن قامتاماسىز ەتۋ قاجەت -دەپ مالىمدەدى وبلىس اكىمىنىڭ ورىنباسارى.

كوميسسيا سونداي-اق ەرەكشە ءبىلىم بەرۋدى قاجەت ەتەتىن بالالاردى پسيحولوگيالىق- پەداگوگيكالىق، الەۋمەتتىك جانە مەديتسينالىق وڭالتۋ ماسەلەلەرىن قارادى. ابزال نۇكەنوۆ بارلىق باعىتتار بويىنشا تاپسىرمالار بەردى. اكىمنىڭ ورىنباسارى بالالار قاۋىپسىزدىگىن قامتاماسىز ەتۋگە باسا نازار اۋداردى.

"ادىرنا" ۇلتتىق پورتالى

پىكىرلەر
ۇقساس جاڭالىقتار