استانادا كۇن ىستىق! شىلدە ايى سولاي بولۋى كەرەك. ال قالىڭ ەل قۇلاق ءتۇرىپ ەلەڭدەگەن ساياسات الەمىندە سالقىنقاندى تىنىشتىق. بيلىكتىڭ مازاسىن الىپ، ۇكىمەتتىڭ قۇتىن قاشتىرادى دەگەن “حالىق قالاۋلىلارى” قىركۇيەكتىڭ باسىنا دەيىن جازعى دەمالىسقا شىعىپ كەتتى.
قىزىق، مۇحيتتىڭ ارعى جاعىنداعى الپاۋىت مەملەكەت اقش-تا جىل ون ەكى اي بويىنا بيلىك باسىنداعى ساياسي كۇرەستەر توقتاۋسىز ءجۇرىپ جاتادى. ال ءبىزدىڭ ەلگە قاراساڭىز “شىقپا جانىم شىقپا” دەگەن ۋاقىت وتكىزىپ امالداۋدىڭ، الدارقاتۋدىڭ قامى.
جاز شىعا كۇزگە دەيىن دەمالىس جاريالاپ تاستايدى. قىركۇيەك كەلگەندە ەندىگى بارلىق كۇردەلى وزگەرىس جىل سوڭىندا بولادى دەپ ۇمىتتەندىرىپ قويادى. ميلادي جاڭا جىلدى تويلاعان حالىق قاڭتاردىڭ ورتاسىنا دەيىن وزدەرىمەن ءوزى بولىپ كەتەدى.
ەندى ەستەرىن جيدى-اۋ دەگەن كەزدە ساياسي ابدەن ماشىقتانعان ادىسكەرلەر كورىسۋ-ناۋرىز كەزىندە بيلىك باسىندا عاجايىپ تۇبەگەيلى وزگەرىستەر بولماقشى دەپ جانە ءبىر ۇران تاستايدى. ساياسي ساراپشىلار، بىلگىرلەر، ءدىلمارلار، كورىپكەلدەر، بال اشىپ، قۇمالاق سالۋشىلار، بيلىككە بايلاۋلى ءبىلىمپاز بلوگەرلەر، قوعامدىق ۇيىمنىڭ بيلىككە مۇددەلى جاعىمپازدارى، بارلىعى دا قوسىلىپ بۇل ساياسي بولجامداردى قوشتاپ-قولپاشتاي كەتىسەدى. مىنە، وسىلايشا ءاز-ناۋرىز مەيرامى دا جەتىپ كەلەدى.
ازداپ تىنىشتاعان سوڭ “ساياسي توڭكەرىس مەرزىمى” بايقاتپاستان مامىر-ماۋسىمعا ەپپەن ىسىرىلا قويىلادى. جاھاندىق دۇربەلەڭ وقيعالار، ەل ىشىندەگى جان تۇرشىگەرلىك جايتتار، قولدان جاسالعان الاڭداتپا ساياسي قىجىرتپالار بيلىك باسىنداعى شاعىن توپتى ونان سايىن قۋاتتاندىرىپ، جىگەرلەندىرىپ، ءوز جەتكەن دەڭگەيلەرىمەن ونان ارمەن ەل بيلىگىن ۇستەي تۇسۋگە جەل بەرگەندەي بولادى. الايدا، جەلدىڭ اتى جەل! جەلبۋازدىق جاقسى احۋال ەمەس! استانانىڭ اڭىزاق جەلى ۇنەمى ۇيىتقىتا سوعىپ تۇراتىنى دا سوندىقتان شىعار-اۋ؟! تىمىرسىق ىستىقتا ونداعان جىلدار بويى تۇمشالانعان قاۋىم سارىارقانىڭ اڭىزاق سامالىن اڭسايدى!
اڭساۋمەن وتكەن بەيمازا عۇمىر-اۋ دەسەڭىزشى؟! جاز-كۇز-قىس-كوكتەم، تاعى دا جاز، تاعى دا جاز، تاعى دا جاز! جازدان جالىققان كىم بار؟!
