باتىس قازاقستان وبلىسىندا ءماسليحات دەپۋتاتتارى مەن ولاردىڭ يەلىگىندەگى كومپانيالار مەملەكەتتىك ساتىپ الۋلار ارقىلى 83,1 ميلليارد تەڭگە جەڭىپ العان. بۇل تۋرالى ProTenge Telegram-ارناسى جاريالادى، دەپ حابارلايدى “ادىرنا” ۇلتتىق پورتالى.
مالىمەت بويىنشا، مەملەكەتتىك ساتىپ الۋلار ارقىلى تابىس تاۋىپ وتىرعان دەپۋتاتتاردىڭ كوپشىلىگى AMANAT پارتياسىنىڭ قۇرامىندا ەكەن.
“مۇندا زاڭعا قايشى ەشتەڭە جوق. دەپۋتاتتارعا مەملەكەتتىك ساتىپ الۋلارعا قاتىسۋعا تىيىم سالىنباعان. ونىڭ ۇستىنە ولار ءماسليحات دەپۋتاتى بولعانى ءۇشىن جالاقى دا المايدى. دەگەنمەن مۇددەلەر قايشىلىعى بار ەكەنى ءسوزسىز. وزدەرىڭىز سالىستىرىپ كورىڭىزدەر”، - دەلىنگەن جازبادا.
سونىمەن قاتار، وندا 2021-2022 جىلدارى مەملەكەتتىك ساتىپ الۋلارعا قاتىسىپ، بيۋدجەتتەن ەڭ كوپ قارجى العان دەپۋتاتتاردىڭ ۇشتىگى كورسەتىلگەن.
ءبىرىنشى ورىندا نۇرعازى ساتباەۆ تۇر. ونىڭ يەلەگىندەگى «Uniserv» جشس جول جوندەۋ جۇمىستارىن جۇرگىزىپ، بيۋدجەتتەن 64,4 ميلليارد تەڭگە العان.
ەكىنشى ورىندا AMANAT پارتياسىنىڭ تاعى ءبىر مۇشەسى يۆان ەنيۋتين تۇر. ونىڭ يەلەگىندەگى «اسفا» فيرماسى جول سالۋعا قاتىستى مەملەكەتتىك تەندەردى جەڭىپ العان. مەملەكەتتىك ساتىپ الۋدىڭ قۇنى – 5,7 ميلليارد تەڭگە.
بۇل ۇشتىكتى نۇرلان سەرعاليەۆ تۇيىندەپ وتىر. ول دا AMANAT پارتياسىنا مۇشە جانە م.وتەمىسوۆ اتىنداعى باتىس قازاقستان ۋنيۆەرسيتەتىنىڭ رەكتورى. ۋنيۆەرسيتەت 2021-2022 جىلدارى بيۋدجەتتەن 3,1 ميلليارد تەڭگەگە قارجىلاندىرىلعان.
«اكىمدىكپەن جۇمىس ىستەپ، ولاردان اقشا الاتىن دەپۋتاتتار بيۋدجەتتى قورعاپ، حالىقتىڭ ەركىن جەتكىزە وتىرىپ، اكىمدىكتى حالىقتىڭ قاجەتىنە قاراي باعىتتاي الا ما؟» - دەلىنگەن جازبادا.
