XIII عاسىردا جازىلعان ايگىلى «موڭعولداردىڭ قۇپيا شەجىرەسى» ەڭبەگى العاش رەت بارلاۋ تۇرعىسىنان ساراپتالعان جاڭا زەرتتەۋ جارىق كوردى، دەپ حابارلايدى "ادىرنا" ۇلتتىق پورتالى.
«شىڭعىس حاننىڭ قۇپيا بارلاۋى» دەپ اتالاتىن بۇل ەڭبەكتىڭ اۆتورلارى — موڭعوليالىق زەرتتەۋشىلەر ج.سويوومبو مەن ج.تۋۆشينتۋر.
كىتاپتا كونە تاريحي قۇجات بارلاۋ قىزمەتى مەن ستراتەگيالىق باسقارۋ جۇيەسىنىڭ نەگىزى رەتىندە قاراستىرىلىپ، ەجەلگى موڭعولداردىڭ اقپارات جيناۋ، وڭدەۋ، تاراتۋ جانە قارسى بارلاۋ ادىستەرى جان-جاقتى سيپاتتالعان.
كىتاپتا «سۇر ات» دەپ اتالاتىن ارنايى وپەراتسيا", "جەرگىلىكتى حالىقپەن جۇمىس ىستەۋ تاسىلدەرى", "دەزينفورماتسيا ارقىلى ستراتەگيالىق ماقساتتارعا جەتۋ", "XIII عاسىرداعى شەشىم قابىلداۋ مادەنيەتى مەن ويلاۋ جۇيەسى" سىندى تاقىرىپتار قاراستىرىلعان.
زەرتتەۋدە كونە شەجىرەنىڭ اسكەري بارلاۋ، ستراتەگيا جانە اقپاراتتىق قاۋىپسىزدىك سالالارى ءۇشىن ماڭىزى ەرەكشە اتاپ كورسەتىلەدى.
ج.سويوومبونىڭ ايتۋىنشا، ەجەلگى دەرەكتى دۇرىس قىرىنان ءتۇسىنۋ بۇگىنگى كۇنگە دە ءتيىمدى ساباق بولماق.
«بۇل ەڭبەك — ءبىزدىڭ حالقىمىزدىڭ باعالى تاريحي مۇراسى. وندا جازىلعان بارلاۋ تاسىلدەرى مەن ستراتەگيالىق ويلاۋ جۇيەسى قازىرگى زاماندا دا وزەكتىلىگىن جوعالتقان جوق»، - دەيدى اۆتور.
اۆتورلار زەرتتەۋ بارىسىندا كونە جانە قازىرگى زامانعى بارلاۋ جۇيەلەرىن سالىستىرىپ، تاريحي پروتسەستەردىڭ اقپاراتتىق قاۋىپسىزدىك، اسكەري تاكتيكا جانە ستراتەگيالىق جوسپارلاۋ سالالارىنا ىقپالىن انىقتاعان.
ماماندار پىكىرىنشە، ەڭبەك عىلىمي قاۋىمداستىق ءۇشىن عانا ەمەس، اقپاراتتىق قاۋىپسىزدىك پەن ۇلتتىق مۇددەنى قورعاۋ سالاسىنداعى ماماندار ءۇشىن دە ماڭىزدى قۇرال بولماق.
