ازەربايجانداعى «روسسيا سەگودنيا» («Sputnik ازەربايجان») اقپارات اگەنتتىگىنىڭ باكۋ فيليالىندا ىشكى ىستەر مينيسترلىگى جۇرگىزگەن ارنايى وپەراتسيا ناتيجەسىندە 7 ادام ۇستالدى. بۇل تۋرالى ارا جانە Day.Az اگەنتتىكتەرى جاريالادى، دەپ حابارلايدى “ادىرنا”.
ازەربايجان رەسپۋبليكاسىنىڭ قىلمىستىق كودەكسىنىڭ بىرنەشە بابى بويىنشا – الاياقتىق، زاڭسىز كاسىپكەرلىك جانە قىلمىستىق جولمەن الىنعان مۇلىكتى زاڭداستىرۋ بويىنشا ءىس قوزعالدى. ۇستالعانداردىڭ ىشىندە ەكى ادام قاماۋعا الىنىپ، تاعى بەسەۋى قىلمىستىق جاۋاپكەرشىلىككە تارتىلدى. تەرگەۋ امالدارى جالعاسۋدا.
Day.Az تاراتقان اقپاراتقا سايكەس، رەسەيلىك تەلەجۇرگىزۋشى ءارى مەديامەنەدجەر مارگاريتا سيمونيان باكۋدەگى فيليال ارقىلى اقشانى زاڭسىز جىمقىرىپ، جىلىستاتقان دەگەن كۇدىككە ءىلىندى. سونىمەن قاتار، ۇستالعان جەتى ادامنىڭ ەكەۋى رەسەيدىڭ فەدەرالدىق قاۋىپسىزدىك قىزمەتىنىڭ (فسب) قىزمەتكەرلەرى ەكەنى انىقتالدى.
30 ماۋسىمدا ازەربايجان ءىىم رەسەيلىك اقپارات اگەنتتىگىنىڭ باكۋدەگى بولىمشەسىندە جەدەل-ىزدەستىرۋ شارالارىن جۇرگىزدى. بۇل شەشىم اگەنتتىك قىزمەتىنىڭ زاڭسىز قارجىلاندىرىلۋى تۋرالى جەدەل مالىمەتتەرگە نەگىزدەلگەن. وپەراتسيا بارىسىندا «Sputnik ازەربايجان» اگەنتتىگىنىڭ ديرەكتورى يگور كارتاۆىح پەن باس رەداكتور ەۆگەني بەلوۋسوۆ قاماۋعا الىندى.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ بۇل ماسەلەگە قاتىستى مالىمدەمە جاساپ، رەسەي باكۋمەن تىكەلەي بايلانىس بارىسىندا ۇستالعان اگەنتتىك قىزمەتكەرلەرىن بوساتۋعا ۇمىتتەنەتىنىن ايتتى.
ء«بىز الداعى ۋاقىتتا ازەربايجان تاراپىمەن تىكەلەي بايلانىس اياسىندا ولاردى بوساتۋعا قول جەتكىزەمىز دەپ ۇمىتتەنەمىز»، – دەدى پەسكوۆ ريا نوۆوستي اگەنتتىگىنە بەرگەن سۇحباتىندا.
قازىرگى تاڭدا «Sputnik ازەربايجان» ءىسى بويىنشا تەرگەۋ جالعاسىپ جاتىر. بۇل جاعداي رەسەي مەن ازەربايجان اراسىنداعى مەديا جانە ساياسي قاتىناستارعا ىقپال ەتۋى مۇمكىن.
ەسكە سالساق، بۇعان دەيىن 27 ماۋسىم كۇنى رەسەيدىڭ فسب قىزمەتكەرلەرى ەكاتەرينبۋرگ قالاسىندا سافاروۆتار وتباسى تۇراتىن بىرنەشە مەكەنجايدا جاساعان ارنايى وپەراتسيادان ازەربايجان ازاماتتارى قازا تاپقانىن حابارلادىق. بۇل وقيعا ازەربايجان مەن رەسەي اراسىنداعى شيەلىنىستى ورشىتە ءتۇستى.
