فوتو: AP
رەسەيدىڭ كەمەروۆو وبلىسىندا اسكەري-ترانسپورتتىق ان-12 ۇشاعى اپاتقا ۇشىراپ، بورتتاعى 19 ادامنىڭ بارلىعى قازا تاپتى. بۇل تۋرالى رەسەي قورعانىس مينيسترلىگىنە سىلتەمە جاساعان Report اگەنتتىگى جازدى، دەپ حابارلايدى “ادىرنا”.
اقپاراتقا سايكەس، اۋە كەمەسى 17 قاراشا كۇنى جوسپارلى رەيسىن ورىنداۋ كەزىندە ياگۋنوۆو اۋىلى ماڭىندا قۇلاعان. بورتتا التى ەكيپاج مۇشەسىن قوسا العاندا، 19 ادام بولعان.
رەسەي قورعانىس مينيسترلىگىنىڭ حابارلاۋىنشا، اپاتقا تەحنيكالىق اقاۋ سەبەپ بولعان. ۇشاق ادام تۇرمايتىن اۋماققا قۇلاعاندىقتان، جەردەگى نىساندارعا زاقىم كەلمەگەن. سونداي-اق بورتتا قاۋىپتى جۇك بولماعانى ايتىلدى.
الدىن الا مالىمەت بويىنشا، ۇشاق نوۆوسىبىردەن كراسنويار ولكەسىندەگى كانسك قالاسىنا باعىت العان. كۋاگەرلەردىڭ سوزىنشە، اۋە كەمەسى اۋەدە جانىپ، كەيىن كۇرت تومەندەپ، جارىلعان. ۇشاق سىنىقتارى 500 مەتر راديۋسقا دەيىن شاشىلعان.
وقيعا ورنىنا جەدەل قىزمەتتەر مەن رەسەيدىڭ اۋە-عارىش كۇشتەرىنىڭ ارنايى كوميسسياسى جىبەرىلگەن. قازىرگى ۋاقىتتا اپاتتىڭ ءمان-جايى انىقتالىپ جاتىر.
ايتا كەتەيىك، ان-12 – اسكەر، اسكەري تەحنيكا جانە جۇك تاسىمالداۋعا ارنالعان كەڭەستىك ءتورت قوزعالتقىشتى ۇشاق. ول 1957 جىلدان بەرى پايدالانىلىپ كەلەدى.
