ەۋرووداق سىرتقى ىستەر كەڭەسىنىڭ كەلەسى وتىرىسىندا رەسەيگە قارسى التىنشى سانكتسيالار پاكەتىن قابىلداماق، دەپ حابارلايدى "ادىرنا" ءتىلشىسى Reuters اگەنتتىگىنە سىلتەمە جاساپ.
بۇل تۋرالى پانامادا وتكەن ءباسپاسوز ءماسليحاتىندا ەۋرووداق سىرتقى ىستەر ءمينيسترى جوزەپ بوررەلل مالىمدەدى. وداق ۋكرايناداعى سوعىسقا بايلانىستى ماسكەۋگە سانكتسيا سالۋ ارەكەتىنىڭ ءبىر بولىگى رەتىندە رەسەيلىك ەنەرگيا ەكسپورتىن شەكتەۋدى كوزدەدەۋدە، دەدى ول.
وداقتىڭ اتقارۋشى ورگانى ەۋروكوميسسيا وسى اپتادا ەو سانكتسيالارىنىڭ پاكەتىن، سونىڭ ىشىندە رەسەيلىك مۇنايدى ساتىپ الۋعا ەمبارگو سالۋدى ۇسىنادى دەپ كۇتىلۋدە - بۇل ماسكەۋدى نەگىزگى كىرىس اعىنىنان ايىراتىن شارا.
سىرتقى ىستەر كەڭەسىنىڭ وتىرىستارىنا توراعالىق ەتەتىن بوررەلل ەو «وسى يمپورتتى ايتارلىقتاي شەكتەۋ ءۇشىن شارالار قابىلداي الادى» دەپ ۇمىتتەنەتىنىن ايتتى، بىراق بلوكتىڭ بارلىق مۇشەلەرىنەن ءالى دە كەلىسىم بولماعانىن مويىندادى.
«بىراق، كەم دەگەندە، مۇناي يمپورتىنا قاتىستى مۇنداي كەلىسىم كەڭەستىڭ كەلەسى وتىرىسىنا دەيىنگى كەزەڭدە مۇمكىن بولاتىنىنا سەنىمدىمىن»، - دەپ قوستى ول.
ايتا كەتەيىك، كەڭەس وتىرىستارى 10 مامىر مەن 16 مامىرعا جوسپارلانعان.
بۇعان دەيىن ەۋروپالىق كەڭەس باسشىسى چارلز ميشەل ەۋرووداق رەسەيگە قارسى قوسىمشا سانكتسيالار قابىلداۋعا دايىندالىپ جاتقانىن ايتقان.
"ادىرنا" ۇلتتىق پورتالى
