فوتو: ANADOLU VIA GETTY IMAGES
چەحيا استاناسى پراگادا جولاۋشى تاسيتىن ەكى پويىزدىڭ بەتپە-بەت سوقتىعىسۋى سالدارىنان 46 ادام جاراقات الدى. ولاردىڭ تورتەۋىنىڭ جاعدايى اۋىر. وقيعا قالانىڭ ورتالىعىندا، باس تەمىرجول ۆوكزالى ماڭىنداعى كوپىردە بولعان، دەپ حابارلايدى "ادىرنا".
DW حابارلاۋىنشا، تەمىرجول اپاتى 17 قاراشا جەرگىلىكتى ۋاقىت بويىنشا تاڭعى ساعات 07:00 شاماسىندا تىركەلگەن. الدىن الا مالىمەتتەرگە سايكەس، ەكى پويىز دا تومەن جىلدامدىقپەن قوزعالعان. زارداپ شەككەندەر اراسىندا ۋكراينانىڭ 15 ازاماتى بار.
اپاتتان كەيىن قالا ماڭىنا قاتىنايتىن پويىزداردىڭ قوزعالىسى شامامەن ەكى ساعاتقا شەكتەلدى. وقيعا ورنىنا پوليتسيا، ءورت ءسوندىرۋ قىزمەتى مەن جەدەل جاردەم بريگادالارى جىبەرىلدى. ساعات 09:00-دەن كەيىن پراگانىڭ باس ۆوكزالىنداعى ءتورت پلاتفورمانىڭ جۇمىسى قايتا قالپىنا كەلتىرىلدى.
ازىرگە پويىزداردىڭ ءبىر تەمىرجول ۋچاسكەسىنە قالاي قاتار شىققانى بەلگىسىز. چەحيانىڭ كولىك ءمينيسترى يۆان بەدناريك بولعان جاعدايدى «وتە اۋىر جاعداي» دەپ باعالاپ، قازىرگى ۋاقىتتا اپاتتىڭ سەبەپتەرى مەن بارلىق ءمان-جايى تەكسەرىلىپ جاتقانىن ايتتى.
الدىن الا باعالاۋ بويىنشا، وقيعادان كەلگەن ماتەريالدىق شىعىن كەمىندە 650 مىڭ ەۋرونى قۇرايدى.
