وزبەكستاندا رەسەي ازاماتتارىن الداعان ءىرى الاياقتىق اشكەرەلەندى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
وزبەكستاننىڭ مەملەكەتتىك قاۋىپسىزدىك قىزمەتى رەسەي ازاماتتارىنان اقشا بوپسالاۋمەن اينالىسقان ءىرى الاياقتىق جەلىنى انىقتادى. كۇدىكتىلەر فەرعانا مەن تاشكەنتتە زاڭسىز «كولل-ورتالىقتار» ۇيىمداستىرىپ، قوڭىراۋ شالۋ ارقىلى ادامداردى الداعان.
تەرگەۋ مالىمەتتەرى بويىنشا، 1986 جىلى تۋعان فەرعانا قالاسىنىڭ تۇرعىنى 32 ادامنان تۇراتىن قىلمىستىق توپ قۇرعان. بارلىق كۇدىكتىلەر قاماۋعا الىنىپ، ولارعا وزبەكستان قىلمىستىق كودەكسىنىڭ 168-بابى (توپ بولىپ جاسالعان الاياقتىق) جانە 278-2-بابى (كومپيۋتەرلىك اقپاراتقا زاڭسىز قول جەتكىزۋ) بويىنشا ءىس قوزعالدى.
كۇدىكتىلەر فەرعانا قالاسىندا ەكى جانە تاشكەنتتە ءبىر «كولل-ورتالىق» اشىپ، رەسەي ازاماتتارىنىڭ جەكە دەرەكتەرىن زاڭسىز پايدالانىپ، ولاردى الداۋ سحەماسىن ۇيىمداستىرعان. الاياقتار ينتەرنەت ارقىلى بيولوگيالىق بەلسەندى قوسپالار (باد) ساتىپ العان ادامداردىڭ بايلانىس دەرەكتەرىن قولدانىپ، ولارعا رەسەي تەرگەۋ ورگاندارىنىڭ قىزمەتكەرلەرى بولىپ حابارلاسقان. ولار تۇتىنۋشىلارعا «باد ساتۋشىلارىنان كەلتىرىلگەن مورالدىق زياندى وتەۋ ءۇشىن اقشالارى قايتارىلادى» دەپ سەندىرىپ، ونى الۋ ءۇشىن تابىس سالىعىن تولەۋ كەرەكتىگىن ايتقان.
قىلمىستىق توپ مۇشەلەرى وزدەرىن رەسەي قارجى مينيسترلىگىنىڭ وكىلدەرى رەتىندە تانىستىرىپ، قۇربانداردى ارنايى شوتتارعا اقشا اۋدارۋعا كوندىرگەن. الاياقتاردىڭ قانشا ادامدى الداعانى جانە ولاردىڭ جالپى قانشا اقشا يەمدەنگەنى تۋرالى اقپارات جاريالانعان جوق.
سوڭعى ۋاقىتتا ينتەرنەت-الاياقتىق قىلمىستىق توپتار اراسىندا كەڭ تاراعان ادىسكە اينالىپ، حالىقارالىق دەڭگەيگە جەتىپ وتىر. مىسالى، 2024 جىلدىڭ ساۋىرىندە وزبەكستاننىڭ ىستامبۇلداعى باس كونسۋلدىعى تۇركياعا باراتىن ازاماتتارعا موشەننيكتەردەن ساق بولۋ كەرەكتىگى تۋرالى ەسكەرتۋ جاساعان. الاياقتار جالعان زاڭگەرلەر مەن قۇقىق قورعاۋ ورگاندارى قىزمەتكەرلەرى رەتىندە ءوزىن تانىستىرىپ، ءتۇرلى جولدارمەن ادامداردان اقشا تالاپ ەتكەن.
