ءماجىلىس توراعاسى ەرلان قوشانوۆ رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكيندى قابىلدادى. تاراپتار ەكىجاقتى قارىم-قاتىناستاردى دامىتۋ ماسەلەلەرىن تالقىلادى، دەپ حابارلايدى «ادىرنا» ءتىلشىسى ءماجىلىستىڭ ءباسپاسوز قىزمەتىنە سىلتەمە جاساپ.
ەرلان قوشانوۆ رەسەي مەن قازاقستان تاتۋ كورشى ءارى وداقتاستىق تۋرالى شارتتى نەگىزگە الا وتىرىپ، ىنتىماقتاستىقتى جۇيەلى تۇردە دامىتىپ كەلە جاتقانىن اتاپ ءوتتى.
«مەملەكەت باسشىلارى ءبىزدىڭ ءتۇرلى سالاداعى ءوزارا بايلانىسىمىزدىڭ جوعارى قارقىنىن ايقىنداپ بەردى. قاسىم-جومارت توقاەۆ پەن ۆلاديمير ءپۋتيننىڭ قاتىسۋىمەن وڭىرارالىق ىنتىماقتاستىق فورۋمدارى تۇراقتى تۇردە وتكىزىلىپ، ناتيجەسىندە ماڭىزدى ەكونوميكالىق جوبالار قولعا الىنۋدا. ءبىزدىڭ ەلدەر اراسىنداعى تاۋار اينالىمى تۇراقتى ءوسىپ كەلەدى جانە 70 پايىز وڭىرلەر اراسىنداعى تىكەلەي ساۋدا ارقىلى قامتاماسىز ەتىلىپ وتىر، – دەدى ول.
قوس تاراپ ءماجىلىس توراعاسىنىڭ رەسەيگە رەسمي ساپارىنا دايىندىق بارىسىن، سونداي-اق قازاقستان دەپۋتاتتارىنىڭ رەسەي فەدەراتسياسىنداعى پرەزيدەنت سايلاۋىن باقىلاۋعا قاتىسۋىن تالقىلادى.
كەزدەسۋ قورىتىندىسى بويىنشا ەكى مەملەكەت قارىم-قاتىناستى نىعايتۋعا، سونىڭ ىشىندە پارلامەنتارالىق ىنتىماقتاستىق اياسىندا دامىتۋعا كەلىستى.
