سپورتقا سىرتتان كەلىپ قوسىلعان سپورتشىلاردى، ياعني، «لەگيونەردى» قازاقستانعا الدىرتۋ قۇبىلىسىن توقتاتۋدى تالاپ ەتەتىندەر دە، ونى قوس قولداپ قولدايتىندار دا تابىلادى. الايدا حالىقارالىق دودالاردا قازاقستاننىڭ اتىنان سىنعا تۇسەتىن شەتەلدىك سپورتشىلار ءالى كۇنگە دەيىن ازايعان جوق. تالاي اڭگىمەگە ارقاۋ بولعان لەگيونەرلەر ماسەلەسى تۋرالى قوعام قايراتەرى جانۇزاق اكىم «ادىرنا» ۇلتتىق پورتالىنىڭ تىلشىسىنە ايتىپ بەردى.
«سپورتتاعى لەگيونەرلەردىڭ ماسەلەسى - وتە جاۋاپتى ماسەلە. بىزدەر لەگيونەرلەردى قولدايمىز دەپ، حالىقتىق سپورتتى ۇمىتتىق. جۇيە بولۋ كەرەك. مەكتەپتەن باستاپ، ءار شاعىن اۋدان، ءار قالادا، ءار اۋداندا ءتۇرلى سپورت ءتۇرىن ۇيىمداستىرىپ، قاداعالاۋ كەرەك. جاقسىلىق ۇشكەمپىروۆ اعالارىمىزدان باستاپ وليمپيادانىڭ چەمپيونىنىڭ كوبى اۋىلدان شىققان. ال قازىر اۋىلدىق مەكتەپتەردى، اۋىلدىق سپورتتى، ولاردىڭ دامۋىنا مۇلدەم كوڭىل بولمەي كەتتىك.
ادام كاپيتالىن ەسكەرۋىمىز كەرەك. دەنى ساۋ ادام - ۋاقىتىندا سالىعىن تولەيتىن، ياعني ەلدى بايىتاتىن، ەلگە پايدالى ازامات. سوندىقتان سپورتقا كوڭىل ءبولىپ، وسى ماسەلەنى تەرەڭنەن قاراۋ كەرەك. لەگيونەرلەر ەڭ كەڭ تاراعان سپورتتىڭ ءتۇرى - فۋتبول. ەۋروپانىڭ كلۋبتارى مەسسي بولسىن، رونالدۋ بولسىن بارلىعى وڭتۇستىك امەريكادان، برازيليا، ارگەنتينا ت.ب. كەلىپ جاتىر. ال ءبىز مەملەكەت رەتىندە الدىمەن، ءوز حالقىمىزدىڭ دەنساۋلىعى جانە سول ءوزىمىزدىڭ حالىقتان شىققان تالانتتاردى شىعارۋىمىز كەرەك. ەلىمىزدە ەشقانداي لەگيونەرلەرسىز شاحماتتان چەمپيوندار شىعىپ جاتىر. 7 جاسار كىشكەنتاي قىزدان باستاپ الەم چەمپيونى بولۋدا»، - دەدى قايراتكەر.
سونداي-اق، لەگيونەرلەردىڭ كوپ بولۋى ەلىمىزدىڭ ەلىكتەۋشىلىك قابلەتىنىڭ باسىمدىعىندا ەكەن.
«ءبىز ەلىكتەپ كەلەمىز. 90-جىلداردان بەرى ەلىكتەپ، 30 جىلدىڭ ىشىندە جامان ادەت قالىپتاستىردىق. امەريكا بولامىز دەپ، الجىپ كەتتىك. قازىر بۇكىل قارجىنى فۋتبول كلۋبتارىنداعى لەگيونەرلەرگە بەرىپ وتىر. جالپى ايتقاندا، قازاقستاندا فۋتبول جوق. ءبىز ءوزىمىزدىڭ جاستارعا، جاستاردى تاربيەلەۋگە كوڭىل ءبولۋىمىز كەرەك، بۇل مەملەكەتتىڭ ءبىرىنشى مىندەتى. سەبەبى، مەملەكەتتەگى ەڭ ءبىرىنشى قۇندىلىق، ول - ادامى، ونىڭ ازاماتى.
ال جەكە كلۋبتار لەگيونەرلەردى شاقىراتىن بولسا ءزاىداتىرسىن. ولاردىڭ ۇلەسى ۇشەۋدەن اسپاۋ كەرەك. رەسەيدە مۇمكىندىك بولماعان سوڭ، سپورتشىلارى بىزگە اعىلىپ جاتىر. سودان كەلگەن بىرەڭ-ساراڭ لەگيونەرلەردى الۋعا بولادى. وعان ەشكىمنىڭ دە قارسىلىعى جوق بولار. الايدا توپىرلاتىپ بارلىعىن الا بەرۋ دۇرىس ەمەس. بىزدە سپورت كومپلەكستەرى، باسسەيندەردىڭ سانىنان كورى اپتەكالاردىڭ سانى 20 ەسەگە دەيىن كوپ. ءتىپتى، اۋىلدىق جەردە سپورت كومپلەكستەرى دە جوق. سوندا حالىقتىڭ بارلىعى اۋرۋ ما؟ بارلىق اۋىل، مەكتەپتەردە ورتا جانە جوعارى وقۋ ورىندارىندا شاحمات، توعىزقۇمالاق سىندى ويىنداردى مىندەتتەۋ قاجەت. وسىلاي بۇقارالىق سپورتتى، جاستاردىق ينتەللەكتۋالدىق دامۋىنا كوڭىل بولسەك، ءوزىمىزدىڭ ىشىمىزدەن دە الەم چەمپيوندارى شىعادى»، - دەيدى جانۇزاق اكىم.
ودان بولەك، قوعام بەلسەندىسىنىڭ ايتۋىنشا، لەگيونەرلەردى ءبىر ورىندا ماڭگى ۇستاپ تۇرا المايمىز.
«لەگيونەرلەر بۇگىن بار، ەرتەڭ جوق. قاي جەردەن كەلدى، سول جەرگە كەتەدى. لەگيوەنەردە وتان بولمايدى. ولاردىڭ وتانى - كونۆەرسيا، اقشا تابۋ. سوندىقتان وسىنى ۇمىتپاعانىمىز ءجون. ءبىز الەۋمەتتىك يننوۆاتسياعا، جالپى ەكونوميكانى يننوۆاتسياعا اينالدىرۋعا كوپ كوڭىل ءبولۋىمىز كەرەك. ال ەكونوميكاسى شيكىزات ەلدەردىڭ ءبارى كەدەي، كوبى قايىرشى. ماسەلەن، ۆەنەسۋەلا مۇنايدان الەمدە 3-ءشى ورىن الادى. بىراق حالقى كەدەي، قايىرشى بولىپ كەتكەن. سوندىقتان ءبىز زامان اعىمىنا ساي ادامعا كوڭىل ءبولۋىمىز كەرەك. ءوزىمىزدىڭ ازاماتتارعا جاعداي جاساۋىمىز قاجەت. ول ءۇشىن بۇقارالىق سپورتتى دامىتۋىمىز كەرەك.. ال وتاندىق سپورتتى دامىتۋ، ول - ۇلتتىق پاتريوتيزم»، دەپ ءسوزىن اياقتادى.
«ادىرنا» ۇلتتىق پورتالى
