قازاق تەلەۆيزياسىندا كوپ جىلدار ءونىمدى ەڭبەك ەتكەن ارداگەر-جۋرناليست، قازاق رۋحانياتىنا سۇبەلى ۇلەس قوسقان جازۋشى گۇلماريا بارمانبەكوۆا شەتەلگە كوشىپ كەتىپ، قازاق ەلىن، تۇتاس قاۋىمدى قارالايتىندارعا سىن ايتتى. جازۋشى تۋعان جەر، وسكەن ءوڭىرىن، ۇلتىن سۇيۋگە، مەملەكەتىن گۇلدەندىرۋگە ات سالىسۋعا شاقىردى. بۇل جايلى "ادىرنا" ۇلتتىق پورتالى جازدى.
- قازاقستاننان قاشقاندار عانا ەمەس، ەلىمىزدى حالىقارالىق قاۋىمداستىققا جاماناتتى ەتىپ كورسەتۋگە جانىن سالىپ تىرىسىپ جۇرگەن، شەتەلدە ءومىر ءسۇرىپ، سول ەلدىڭ ازاماتى اتانعان قازاقتار دا بار. ءبارى ەمەس، ارينە، ءىشىنارا. ءوزى تۇرىپ جاتقان ەلدەگى ءتۇرلى باق-تاردا، الەۋمەتتىك جەلىلەردە، قازاقستان بيلىگى تۋرالى جاعىمسىز اقپاراتتاردى جاھانعا جاريا ەتەدى.ۇرىمتال، قىسىلتاياڭ شاقتا ەلدەگى جوق-جىتىكتەرگە يتكە سۇيەك لاقتىرعانداي ازىن-اۋلاق كومەك ۇيىمداستىرىپ، وزىنشە قامقورسي قالادى. وسىلايشا قاراپايىم حالىقتىڭ كوزىنە ءوزىن كەرەمەت جاناشىر ەتىپ كورسەتۋ ارقىلى بيلىك پەن ەكى اراعا وت سالادى. مۇندايدى ساباننىڭ استىنان سۋ جىبەرىپ قويىپ، سىرتىنان قىزىقتاپ وتىراتىن زىمياندىق دەيدى، - دەپ تەرەڭنەن تولعادى اۆتور.
جازۋشى ءوز جازباسىنىڭ جالعاسىندا شەتەلگە كەتكەندەردىڭ وتانىنا وپاسىزدىق ىستەگەن قارەكەتىن سىنعا الىپ، ايىپتادى. قازاق ەلىنىڭ كەمەل كەلەشەگى مەن زور بولاشاعىنان ءۇمىتتى ەكەندىگىن جەتكىزدى.
- ءيا، ونىڭ [جاماندايتىنداردىڭ] ءتۇرى كادىمگى قارادومالاق قازاق بالاسى. بىراق جۇرەگى الدەقاشان بوتەن دەپ سوعاتىن بولعان. نيەتى ءتۇزۋ ەمەس. ويى ارام. جانى اشىعان بولىپ، وتىرىك كولگىرسيدى. قاراپايىم حالىقتىڭ بىلمەگەنىن بىلدىرگەن بولىپ، بىلگىرسيدى. وندايلاردى قازاق "شىرىگەن جۇمىرتقا" دەپ قويادى. دامىعان ەلدە قارنى توق، كويلەگى كوك، قايعىسى جوق، تۇرىپ جاتىر ەكەن، ءوز جونىمەن تۇرا بەرسە قايتەدى ەكەن؟ قازاقستاننىڭ قامىن جەپ، تىرلىگىن كۇيتتەۋ سولارعا قالىپ پا؟ ولارسىز دا قازاق ەلىنىڭ تاڭى اتىپ، تاۋىعى شاقىرعان. شاقىرا بەرەدى دە!ۇلتى ءۇشىن سونشا جانى كۇيەدى ەكەن، نەگە كەلمەيدى قازاقستانعا؟ نەگە ەڭبەك سىڭىرمەيدى ەلگە؟ نەگە ۇرپاعىن ۇلتجاندى ەتىپ تاربيەلەمەيدى؟ نەگە ەلمەن بىرگە ۋ ىشسە ۋ ءىشىپ، سۋ ىشسە سۋ ءىشىپ، ىستىعىنا بىرگە كۇيىپ، سۋىعىنا بىرگە توڭبايدى؟ سونداي دەموكرات، سونداي پاراساتتى ەكەن، نەگە ادىلەتتى قازاقستاندى بىرگە ورناتپايدى؟ جوق، ولارعا وزدەرى تۇرىپ جاتقان ەلدەگىدەي جوعارى ەڭبەكاقى، كەرەمەت جاعداي تۋعىزۋ كەرەك! ولاي بولماسا، ەلمەن بىرگە قابىرعاسىن قايىستىرعىسى كەلمەيدى. ويتە المايدى ەكەن، ايدالادا وتىرىپ الىپ، اۋزدارىنا كەلگەندى وتتاپ، ەل ىشىنە ىرىتكى سالعاندارىنا ءجون بولسىن!جامان با، جاقسى ما، بۇل - ءبىزدىڭ ەل. ءوزىمىز تاڭداعان بيلىگىمىزدىڭ كەمشىلىگى بولسا، ءوزىمىز تۋرالاپ الامىز. وزگە ەل پىسىقايلارىنىڭ كومەگىنسىز-اق، ءوز قوتىرىمىزدى ءوزىمىز قاسىپ الامىز! ەشكىم ءبىزدىڭ باسىمىزعا جۇماق ورناتپاي-اق قويسىن! - دەدى گۇلماريا بارمانبەكوۆا.
ەستەرىڭىزگە سالا كەتەيىك، اۆتوردىڭ بۇلاي وي تولعاپ، سىن ايتۋىنا يۋتۋب حوستينگىندەگى "زۋبايدا پاتريوت" اتتى قولدانۋشىنىڭ قازاقستانعا قاتىستى كوزقاراسى سەبەپ بولعان.
"ادىرنا" ۇلتتىق پورتالى
