«AMANAT» پارتياسى اقتوبە وبلىسىندا 20 مىڭ گا استام جايىلىمدى مەملەكەت مەنشىگىنە قايتاردى

3018
Adyrna.kz Telegram

اقتوبە وبلىسىندا مەملەكەت مەنشىگىنە 20 مىڭ گەكتاردان استام جايىلىمدىق جەر قايتارىلدى. بۇل تۋرالى قوبدا اۋدانىندا وتكەن «AMANAT» پارتياسى جانىنداعى «جەر اماناتى» كوميسسياسىنىڭ كوشپەلى وتىرىسىندا ايتىلدى.

«مەملەكەت باسشىسى جەردى ءوزى دە پايدالانبايتىن، وزگەگە دە بەرمەيتىن جەر يەلەنۋشىلەر بار ەكەنىن بىرنەشە رەت ايتقان بولاتىن. وسى ماسەلەدە ادىلدىكتى قالپىنا كەلتىرۋ — ءبىزدىڭ كوميسسيانىڭ باستى مىندەتى. بۇل باعىتتا اتقارىلعان جۇمىس ناتيجەسى بويىنشا بۇگىن اقتوبە وبلىسىندا مەملەكەت مەنشىگىنە 20 مىڭ گەكتار جەر قايتارىلدى. جۇمىس جالعاسىن تابادى»، - دەدى «AMANAT» پارتياسىنىڭ حاتشىسى داۋلەت كارىبەك.

اتاپ ايتقاندا، بايعانين اۋدانىندا – 15 مىڭ گا، حرومتاۋ اۋدانىندا – 1,9 مىڭ گا، قوبدا اۋدانىندا – 2,1 مىڭ گا، ايتەكە بي اۋدانىندا – 149 گا، قارعالى اۋدانىندا – 876 گا، اقتوبە قالاسىندا – 370 گا جايىلىم مەملەكەت مەنشىگىنە قايتارىلدى.

وبلىستىق اۋىل شارۋاشىلىعى باسقارماسىنىڭ مالىمەتىنە سايكەس، وڭىردەگى بارلىق جايىلىمنىڭ جالپى كولەمى 25 ملن. گا جەتەدى. ولاردىڭ كوپشىلىگى شالعاي اۋدانداردا ورنالاسقان، ال جەر ۋچاسكەلەرى نەگىزىنەن ەلدى مەكەندەردىڭ اينالاسىندا تاپشى.

«وبلىستىڭ جەكە قوسالقى شارۋاشىلىقتاردا 314,8 مىڭ باس مال تىركەلگەن. ولاردى جايۋ ءۇشىن شامامەن 105 مىڭ گا جەتىسپەيدى. بۇل ماسەلە اسىرەسە، العا، مارتوك، تەمىر اۋداندارىندا جانە اقتوبە قالاسىندا وزەكتى. قازىردىڭ وزىندە جەردى ءجون-جوسىقسىز پايدالانعانداردىڭ ءتىزىمى 244-كە جەتتى. ماتەريالدار قۇزىرەتتى ورگاندارعا جولداندى»، – دەپ مالىمدەدى باسقارما باسشىسى يساتاي ەسپاعانبەتوۆ.

ەسكە سالا كەتەيىك، پارتيا جانىنان «جەر اماناتى» كوميسسياسى قۇرىلعان بولاتىن. سوڭعى بىرنەشە اي ىشىندە كوميسسيانىڭ كۇشىمەن قاراعاندى، جامبىل جانە تۇركىستان وبلىستارىنداعى 140 مىڭ گەكتاردان استام جايىلىمدىق جەر مەملەكەت مەنشىگىنە قايتارىلدى.

پىكىرلەر