26 ماۋسىمعا قاراعان ءتۇنى الماتى وبلىسىندا بەلسەندى سەرىكجان ءبىلاشتىڭ اپكەسىنىڭ ۇيىندە ءتىنتۋ جۇرگىزىلىپ، ونىڭ پوليتسيامەن قوناەۆ قالاسىنا جەتكىزىلگەنى بەلگىلى بولدى، دەپ حابارلايدى "ادىرنا" ازاتتىق راديوسىنا سىلتەپ.
اقپاراتتى باتيقا ءبىلاشتىڭ جۇبايى امانتاي اعيدوللا مالىمدەگەن. ونىڭ ايتۋىنشا، باتيقا ءبىلاشتىڭ قانداي سەبەپپەن ۇستالعانى ازىرگە بەلگىسىز.
«نە ءۇشىن الىپ كەتكەنىن بىلمەيمىز. قازىر پوليتسيادا ءجۇرمىز»، – دەگەن ول.
امانتاي اعيدوللانىڭ سوزىنشە، تىنتۋگە شامامەن 20-عا جۋىق قىزمەتكەر، ونىڭ ىشىندە ارنايى جاساق وكىلدەرى قاتىسقان. ونىڭ ايتۋىنشا، قۇقىق قورعاۋ ورگاندارى ۇيدەن جۇمىس ىستەمەيتىن ۇيالى تەلەفون مەن بىرنەشە قۇران كىتابىن تاركىلەگەن.
باتيقا ءبىلاشتىڭ ادۆوكاتى شىنقۋات بايجانوۆ قازىرگى ۋاقىتتا پوليتسياعا بارا جاتقانىن، وقيعاعا قاتىستى ناقتى مالىمەتتىڭ ازىرگە جوق ەكەنىن ايتتى.
ءوز كەزەگىندە الماتى وبلىستىق پوليتسيا دەپارتامەنتىنىڭ ءباسپاسوز قىزمەتى اتالعان اقپاراتتىڭ ءمان-جايىن انىقتاپ جاتقانىن حابارلاعان.
باتيقا ءبىلاش – اقش-تا تۇراتىن جانە شىڭجاڭداعى جاعدايعا قاتىستى ماسەلەلەردى كوتەرىپ جۇرگەن بەلسەندى سەرىكجان ءبىلاشتىڭ اپكەسى. ونىڭ ۇستالۋىنا وسى جايتتىڭ قاتىسى بار-جوعى ازىرگە رەسمي تۇردە ناقتىلانباعان.
