قازاقستاننىڭ كورنەكتى عالىمى، اكادەميك، فيزيكا-ماتەماتيكا عىلىمدارىنىڭ دوكتورى، پروفەسسور، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، ۇلتتىق يادرولىق ورتالىعىنىڭ بۇرىنعى باس ديرەكتورى قايرات كامالۇلى قادىرجانوۆ ومىردەن وزدى. قارالى حاباردى ورتالىق ۇجىمى جەتكىزدى، دەپ حابارلايدى "ادىرنا".
قايرات قادىرجانوۆ 2006–2012 جىلدارى ۇلتتىق يادرولىق ورتالىقتى باسقارىپ، ەلىمىزدىڭ عىلىمىنىڭ دامۋىنا، عىلىمي الەۋەتىنىڭ نىعايۋىنا جانە قازاقستانداعى اتوم سالاسىنىڭ قالىپتاسۋىنا ەلەۋلى ۇلەس قوستى.
ونىڭ باسشىلىعىمەن بۇرىنعى سەمەي يادرولىق سىناق پوليگونى اۋماعىنداعى يادرولىق سىناق ينفراقۇرىلىمىن جويۋعا باعىتتالعان اۋقىمدى جۇمىستار جۇزەگە اسىرىلدى. سونىمەن قاتار اتوم ەنەرگەتيكاسىن دامىتۋعا ارنالعان ماڭىزدى جوبالار ىسكە اسىرىلىپ، حالىقارالىق عىلىمي-تەحنيكالىق ىنتىماقتاستىق كەڭەيتىلدى.
ۇلتتىق يادرولىق ورتالىقتىڭ مالىمەتىنشە، قايرات قادىرجانوۆتىڭ كاسىبي بىلىكتىلىگى، ستراتەگيالىق كوزقاراسى مەن عىلىمعا ادالدىعىنىڭ ارقاسىندا ورتالىق ەلىمىزدىڭ جەتەكشى عىلىمي مەكەمەلەرىنىڭ بىرىنە اينالىپ، حالىقارالىق عىلىمي قاۋىمداستىقتىڭ جوعارى باعاسىنا يە بولدى.
عالىم رادياتسيالىق فيزيكا، راديوەكولوگيا جانە يادرولىق تەحنولوگيالار سالاسىندا كوپتەگەن عىلىمي ەڭبەك جازىپ، وسى باعىتتاردىڭ دامۋىنا ەلەۋلى ۇلەس قوستى. ارىپتەستەرى ونى بىلىكتى ۇيىمداستىرۋشى، پاراساتتى باسشى جانە ءومىرىن عىلىم مەن ەل يگىلىگىنە ارناعان ازامات رەتىندە ەسكە الادى.
