قازاقستاننىڭ ەنەرگەتيكا ءمينيسترى ەرلان اقكەنجەنوۆ قاراشىعاناق كەن ورنىنداعى گاز ءوندىرۋ كولەمى ۋاقىتشا قىسقارتىلعانىن ايتتى. ونىڭ سوزىنشە، بۇل شەشىم رەسەيدىڭ ورىنبور گاز وڭدەۋ زاۋىتىنا جاسالعان شابۋىلدان كەيىن قابىلدانعان، دەپ حابارلايدى "ادىرنا".
ءمينيستردىڭ مالىمەتىنشە، قازىرگى ۋاقىتتا قاراشىعاناقتاعى ءوندىرىس تاۋلىگىنە 34 مىڭ توننادان 25 مىڭ تونناعا دەيىن ازايعان. ياعني، ءوندىرىس كولەمى 9 مىڭ تونناعا قىسقارعان. سوعان سايكەس گاز قابىلداۋ كولەمى دە تومەندەگەن.
سوعان قاراماستان، ەرلان اقكەنجەنوۆ قازاقستاندا تابيعي گازبەن قامتاماسىز ەتۋ تۇراقتى ەكەنىن ايتتى.
«قازىرگى ۋاقىتتا گازبەن جابدىقتاۋ جۇيەسىنىڭ جۇمىسى بۇزىلعان جوق. قازاقستان بارلىق گاز جەتكىزۋ جونىندەگى مىندەتتەمەلەرىن تولىق كولەمدە ورىنداپ وتىر»، – دەدى مينيستر.
قاراشىعاناق كەن ورنىندا قۇرامىندا كۇكىرت مولشەرى جوعارى تابيعي گاز وندىرىلەدى. مۇنداي گازدى تىكەلەي تۇتىنۋعا بولمايتىندىقتان، ول وڭدەۋ ءۇشىن رەسەيدىڭ ورىنبور قالاسىنداعى گاز وڭدەۋ زاۋىتىنا جىبەرىلەدى. تازارتىلعاننان كەيىن تاۋارلىق گاز قايتادان قازاقستانعا جەتكىزىلىپ، ىشكى تۇتىنۋشىلارعا تاراتىلادى.
مينيسترلىكتىڭ مالىمەتىنشە، قازىرگى جاعدايعا قاراماستان، ەلدەگى گاز جەتكىزۋ جۇيەسىنىڭ تۇراقتى جۇمىسى قامتاماسىز ەتىلگەن جانە تۇتىنۋشىلار ءۇشىن گاز تاپشىلىعى قاۋپى جوق.
