Aqtóbe oblysynda memleket menshigine 20 myń gektardan astam jaıylymdyq jer qaıtaryldy. Bul týraly Qobda aýdanynda ótken «AMANAT» partııasy janyndaǵy «Jer amanaty» komıssııasynyń kóshpeli otyrysynda aıtyldy.
«Memleket basshysy jerdi ózi de paıdalanbaıtyn, ózgege de bermeıtin jer ıelenýshiler bar ekenin birneshe ret aıtqan bolatyn. Osy máselede ádildikti qalpyna keltirý — bizdiń komıssııanyń basty mindeti. Bul baǵytta atqarylǵan jumys nátıjesi boıynsha búgin Aqtóbe oblysynda memleket menshigine 20 myń gektar jer qaıtaryldy. Jumys jalǵasyn tabady», - dedi «AMANAT» partııasynyń Hatshysy Dáýlet Káribek.
Atap aıtqanda, Baıǵanın aýdanynda – 15 myń ga, Hromtaý aýdanynda – 1,9 myń ga, Qobda aýdanynda – 2,1 myń ga, Áıteke bı aýdanynda – 149 ga, Qarǵaly aýdanynda – 876 ga, Aqtóbe qalasynda – 370 ga jaıylym memleket menshigine qaıtaryldy.
Oblystyq aýyl sharýashylyǵy basqarmasynyń málimetine sáıkes, óńirdegi barlyq jaıylymnyń jalpy kólemi 25 mln. ga jetedi. Olardyń kópshiligi shalǵaı aýdandarda ornalasqan, al jer ýchaskeleri negizinen eldi mekenderdiń aınalasynda tapshy.
«Oblystyń jeke qosalqy sharýashylyqtarda 314,8 myń bas mal tirkelgen. Olardy jaıý úshin shamamen 105 myń ga jetispeıdi. Bul másele ásirese, Alǵa, Mártók, Temir aýdandarynda jáne Aqtóbe qalasynda ózekti. Qazirdiń ózinde jerdi jón-josyqsyz paıdalanǵandardyń tizimi 244-ke jetti. Materıaldar quzyretti organdarǵa joldandy», – dep málimdedi basqarma basshysy Isataı Espaǵanbetov.
Eske sala keteıik, partııa janynan «Jer amanaty» komıssııasy qurylǵan bolatyn. Sońǵy birneshe aı ishinde komıssııanyń kúshimen Qaraǵandy, Jambyl jáne Túrkistan oblystaryndaǵy 140 myń gektardan astam jaıylymdyq jer memleket menshigine qaıtaryldy.
