سىرتقى ىستەر مينيسترلىگى قازاقستاندىقتاردىڭ اقش ۆيزاسىن الۋ كەزىندە ءجيى كەزدەسەتىن باس تارتۋ سەبەپتەرىنە تۇسىنىكتەمە بەردى. ۆەدومستۆونىڭ رەسمي وكىلى ەرلان جەتىباەۆتىڭ ايتۋىنشا، ۆيزانى بەرۋ نەمەسە بەرمەۋ تۋرالى شەشىمدى اقش تاراپى قابىلدايدى. ەگەر ءوتىنىش بەرۋشى بارلىق قاجەتتى قۇجاتتاردى تالاپقا ساي ۇسىنىپ، زاڭ تالاپتارىن بۇزباسا، ۆيزا الۋ مۇمكىندىگى جوعارى بولادى، دەپ حابارلايدى "ادىرنا".
«ەگەر قۇجاتتاردا قانداي دا ءبىر كەمشىلىك بولسا، ازاماتتان قوسىمشا مالىمەت نەمەسە قۇجات سۇرالادى. ولار ۇسىنىلعاننان كەيىن، مەنىڭ بىلۋىمشە، كوپ جاعدايدا ۆيزا ماقۇلدانادى»، – دەدى ەرلان جەتىباەۆ.
ءسىم وكىلىنىڭ سوزىنشە، ۆيزادان باس تارتۋدىڭ نەگىزگى سەبەپتەرىنىڭ ءبىرى – قۇجاتتاردى راسىمدەۋ كەزىندە جىبەرىلەتىن تەحنيكالىق قاتەلىكتەر.
«بۇل كوبىنە قۇجاتتاردىڭ تالاپتارعا سايكەس كەلمەۋىمەن بايلانىستى. كەيدە انكەتا تولتىرۋدا، ساقتاندىرۋ راسىمدەۋدە نەمەسە جول ءجۇرۋ بيلەتتەرىن ۇسىنۋدا قاتەلىكتەر بولادى. ءاربىر جاعداي جەكە قارالادى»، – دەپ ءتۇسىندىردى ول.
سونداي-اق جەتىباەۆ قازاقستانداعى اقش كونسۋلدىقتارىنا جۇگىنەتىن رەسەي ازاماتتارىنىڭ ۆيزانى ءجيى الاتىنى تۋرالى اقپاراتتى جوققا شىعاردى.
«مۇنداي مالىمەت جوق. اقش ەلشىلىگى تاراپىنان دا مۇنداي ستاتيستيكا نەمەسە رەسمي اقپارات جاريالانعان جوق»، – دەدى ءسىم وكىلى.
بۇعان دەيىن قر ءسىم ءبىرىنشى ۆيتسە-ءمينيسترى ەرجان اشىقباەۆ قازاقستاندىقتاردىڭ شامامەن 45–46 پايىزىنا اقش ۆيزاسىن الۋعا ءوتىنىش بەرگەندە باس تارتىلاتىنىن مالىمدەگەن بولاتىن.
سونداي-اق ءسىم ەۋروپالىق وداق ەلدەرىنىڭ ۆيزالارىن قاراۋ مەرزىمىنىڭ ۇزاققا سوزىلۋ سەبەپتەرىن ءتۇسىندىرىپ، ەو-مەن ۆيزالىق رەجيمدى جەڭىلدەتۋ بويىنشا جۇرگىزىلىپ جاتقان كەلىسسوزدەر تۋرالى دا اقپارات بەرگەن ەدى.
