بۇگىن قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىس اكىمى وڭداسىن ورازالين اقتوبە وبلىسىندا مەملەكەت باسشىسىنىڭ حالىقتىڭ ءال-اۋقاتىن كوتەرۋ، مەملەكەتتىك باعدارلامالاردىڭ جۇزەگە اسىرىلۋى، سونىمەن قاتار، ءوڭىردىڭ 2021 جىلدىڭ قورىتىندىسى بويىنشا الەۋمەتتىك-ەكونوميكالىق دامۋى جونىندەگى تاپسىرماسى اياسىندا اتقارىلىپ جاتقان شارالار جايىندا باياندادى.
«ادىرنا» ۇلتتىق پورتالىنىڭ ءتىلشىسى اقتوبە وبلىسىنىڭ اكىمى وڭداسىن ورازالينگە: «وبلىس ورتالىعىنداعى قوعامدىق تاسىمالداۋشىلاردىڭ جۇمىسى قاناعاتتانارلىقسىز. بۇل باعىتتا قانداي شارۋالار اتقارىلدى؟» - دەگەن ساۋال قويدى.
«اقتوبە قالاسىندا قوعامدىق كولىك تاسىمالى ماسەلەسىن جۇيەلى تۇردە شەشۋ قولعا الىندى. سوڭعى التى جىلدا بيۋدجەت تاراپىنان قولداۋدىڭ بولماۋى سالدارىنان وبلىس ورتالىعىندا قوعامدىق تاسىمال سالاسىنىڭ كەنجەلەپ قالعانى راس. بۇل ءبىر جىلدا شەشىلەتىن ماسەلە ەمەس. ءبىز الدىمەن اقتوبە نارىعىنا قوعامدىق تاسىمالمەن اينالىسۋشى كومپانيالاردى تارتۋ ءۇشىن بيۋدجەت تاراپىنان سۋبسيديالاۋ ماسەلەسىن شەشتىك. الەۋمەتتىك وتەماقىنى شەشتىك. ياعني، الەۋمەتتىك وسال توپتىڭ 7 ساناتى جەڭىلدەتىلگەن جولاقىمەن قاتىنايتىن بولدى. الەۋمەتتىك مارشرۋتتار سۋبسيديالاناتىن بولعاندىقتان، اقتوبە نارىعىنا الماتىدان جانە اتىراۋدان جاڭا اۆتوبۋستارىمەن ەكى كومپانيا قوسىلدى. ولاردىڭ قىزمەت كورسەتۋ ساپاسى باسەكەلەستىك ورتانىڭ تالابىن تۋعىزدى. ياعني، اقتوبەدەگى بۇرىنعى “اۆتوپارك” سەرىكتەستىگى دە اۆتوپاركىن جاڭارتۋعا كىرىستى. ءسويتىپ، الماتىلىق “قالا ترانس” كومپانياسى - 32, اتىراۋلىق “اقجايىق اۆتوپارك” - 18, اقتوبەنىڭ ءوزىنىڭ “اۆتوپارك” سەرىكتەستىگى 23 جاڭا اۆتوبۋس اكەلدى. بىراق بۇل ءالى دە جەتكىلىكسىز. بۇگىنگى كۇنى كۇنىنە مارشرۋت جەلىسىنە 350 اۆتوبۋس شىعىپ جۇرسە، ءالى دە 150-200-دەي اۆتوبۋس قاجەتتىلىگى بار. جىل سوڭىنا دەيىن ونى اتالعان كومپانيالار اكەلەمىز، تولىقتىرامىز دەپ ۋادە بەرىپ وتىر. قازىردىڭ وزىندە وسى جاڭا اۆتوبۋستاردىڭ ەسەبىنەن قالا ماڭىنداعى ەلدى مەكەندەرگە قاتىنايتىن اۆتوبۋستاردى جاڭارتۋ ماسەلەسىن شەشىپ باستادىق»، - دەپ جاۋاپ بەردى وڭداسىن ورازالين.
اكىمنىڭ ايتۋىنشا، اقتوبە وبلىسىندا بارلىق نەگىزگى كورسەتكىش بويىنشا وڭ ديناميكا قامتاماسىز ەتىلگەن.
“وڭدەۋ ونەركاسىبىنىڭ كولەمى 102,7%، ينۆەستيتسيا – 120,6%، قۇرىلىس – 104%، تۇرعىن ءۇيدى پايدالانۋعا بەرۋ – 113,6%، ساۋدا 104,8%.
ءوڭىر ەكونوميكاسىنىڭ نەگىزگى ۇلەسىن ونەركاسىپ الادى، شامامەن 37%. ونەركاسىپ ءوسىمىن قامتاماسىز ەتۋ ءۇشىن وڭىردە جاڭا كاسىپورىندار پايدالانۋعا بەرىلىپ، جۇمىس جاساپ جاتقاندارى جاڭارتىلۋدا. 2021 جىلى وڭىرگە 842, 6 ملرد تەڭگە ينۆەستيتسيا تارتىلدى.جىل سوڭىنا دەيىن 80 ملرد تەڭگەگە ەنەرگەتيكا، مۇناي وڭدەۋ، ازىق-تۇلىك ونەركاسىبى، تسيفرلانلىرۋ جانە ت.ب. سالالارىندا 23 ينۆەستيتسيالىق جوبانى ەنگىزۋ جانە شامامەن1,2 مىڭ جۇمىس ورنىن اشۋ جوسپارلانىپ وتىر»، - دەدى وڭداسىن ورازالين.
سونداي-اق، وڭىردە شاعىن جانە ورتا بيزنەس سالاسىن دامىتۋدا وڭ ديناميكا ساقتالىپ وتىر.
2021 جىلدىڭ قورىتىندىسى بويىنشا جۇمىس ىستەپ جاتقان سۋبەكتىلەر سانى 6,8% ءوسىپ، 65 992 بىرلىكتى قۇرادى. شاعىن جانە ورتا كاسىپكەرلىك سۋبەكتىلەرى شىعارعان ءونىم كولەمى 1,4 ترلن. تەڭگەنى، ءوسىم 21,7% قۇرادى.
5300-دەن استام شوب جوباسى مەملەكەتتىك قولداۋدىڭ قولدانىستاعى مەحانيزمدەرىن پايدالاندى، بۇل 2020 جىلدىڭ وسىنداي كەزەڭىمەن سالىستىرعاندا ەكى ەسە كوبىرەك. سونىڭ ىشىندە، «بيزنەستىڭ جول كارتاسى» اياسىندا 4030 شوب جوباسى قولداۋ تاۋىپ، «قاراپايىم زاتتار ەكونوميكاسى» باعدارلاماسى اياسىندا 74, «ەڭبەك» باعدارلاماسى اياسىندا 1261 جوبا ماقۇلدانعان.
«وسى جىلعى 5 ايدىڭ قورىتىندىسى بويىنشا وڭىردە تۇراقتى ماكروەكونوميكالىق جاعداي ساقتالۋدا. جالپى سالالار بويىنشا ونەركاسىپ ءونىمىنىڭ ءوسىمى 101,4%، ينۆەستيتسيالار – 104,8%، قۇرىلىس جۇمىستارى – 101,1%، تۇرعىن ءۇيدى پايدالانۋعا بەرۋ – 101,4%، كولىك جانە قويمالاۋ – 110,0% قۇرادى»، - دەپ قورىتىندىلادى سپيكەر.
”ادىرنا” ۇلتتىق پورتالى
