الماتىدا اسكەرگە ساۋ كەتكەن سارباز وردابەك تۇيمەباەۆ اسكەردەن مەرزىمىنەن بۇرىن ۇيىنە ورالعان. اكەسىنىڭ ايتۋىنشا، دەنى ساۋ بالاسى التى ايدا پسيحياتريالىق اۋرۋحانادان ءبىر-اق شىققان، دەپ حابارلايدى «ادىرنا» ۇلتتىق» پورتالى 31 ارنانىڭ
"اقشا بەرمەسەڭ تەپكىلەيدى": الماتىدا اسكەرگە ساۋ كەتكەن سارباز پسيحياتريالىق اۋرۋحانادان ءبىر-اق شىقتى
27.05.2022
9011
اكەسى وتان الدىنداعى بورىشىن وتەپ جۇرگەن جالعىز ۇلىن كومانديرلەرى سوققىعا جىعىپ، قىسىم كورسەتكەن دەيدى. ءسويتىپ، ءۇش اپتا بۇرىن ۇلىن ەشتەڭە تۇسىندىرمەستەن، "بورىشىن وتەدى، ءبارى جاقسى" دەپ اكەپ تاستاپتى. قازىر 21 جاستاعى جىگىت نۇر-سۇلتانداعى پسيحياتريالىق اۋرۋحانادا ەم الىپ جاتىر.
الماحان بالىقباەۆتىڭ جالعىز ۇلى وردابەك وتكەن جىلى قاراشا ايىندا اسكەرگە شاقىرىلىپ، الماتىداعى 7552 اسكەري بولىمىنە جىبەرىلگەن.
سوزىنشە، دەنساۋلىعىندا ەشقانداي كىنارات بولماعان. ارادا التى ايعا جۋىق ۋاقىت وتكەندە اسكەريلەر بالاسىن ۇيىنە اكەپ تاستاعان. بىراق نە ءۇشىن اسكەري قىزمەتتەن مەرزىمىنەن بۇرىن بوساتىلعانىن تۇسىندىرمەپتى. ال كەلەسى وردابەكتىڭ مىنەز-قۇلقى وزگەرىپ شىعا كەلگەن. ءسويتىپ، بىردە تەلەفونىن، بىردە كۋالىگىن جوعالتىپ، ۇيدەگى دۇنيەلەردى ورتەي باستاپتى.
“بالام وقتا-تەكتە ايتىپ قالادى. “تەك اقشا سۇراۋمەن بولدى. اقشا بولماسا، تورتەۋ، بەسەۋ بولىپ تەپكىلەيدى مەنى” دەيدى”، – دەيدى وردابەكتىڭ اكەسى الماحان بالىقباەۆ.
الماحاننىڭ ايتۋىنشا، كۇن وتكەن سايىن جالعىز ۇلىنىڭ جاعدايى ۋشىعا باستاعان. بارماعان دارىگەرى، اپارماعان اۋرۋحاناسى قالماپتى. اقىرى، بالاسىن نۇر-سۇلتانداعى پسيحياتريالىق اۋرۋحاناعا جاتقىزۋعا ءماجبۇر بولادى. قازىر وردابەك ون كۇننەن بەرى سوندا ەم قابىلداپ جاتىر ەكەن.
“ونى مىنا جاعدايعا ءتۇسىپ كەتكەن تانىماي قالدى. ءوزىن-ءوزى بىلمەي قالىپ ىستەپ جاتىر عوي. ەسى كىرەلى-شىعالى بولىپ تۇرادى. بالامىز دا ءبارى بۇرىنعىداي ەمەس”، – دەيدى وردابەكتىڭ اناسى گۇلسارا ەلتوقوۆا.
ۇلتتىق ۇلان "وڭتۇستىك" وڭىرلىك قولباسشىلىعىنىڭ وكىلدەرى ساربازعا ەشقانداي قىسىم كورسەتىلگەن جوق دەدى. سوزدەرىنشە، وردابەك اسكەردە جۇرگەن التى ايدا ۇنەمى دارىگەرلەردىڭ باقىلاۋىندا بولىپتى. ويتكەنى، العاشقى اپتادا-اق بالانىڭ ءبىرتۇرلى ەرسى قىلىقتارىن بايقاعان. سوندىقتان ارنايى مامانداردىڭ كومەگىنە جۇگىنىپتى.
“ۇرىپ-سوعۋ دەگەن بولعان جوق. ەگەر قازىر دە ونداي ءبىر نەتەتىن بولسا، ۇردى-سوقتى دەيتىن بولسا، ءبىزدىڭ قۇقىق قورعاۋ ورگاندارى بار. ولارعا سول نەسىمەن ايتىپ، ءبارىن تەكسەرىلەدى. ەندى ەشقانداي دا، ەگەر كىنالى ادامدار بولسا جاۋاپكەرشىلىككە تارتىلادى”، – دەيدى قر ۇۇ "وڭتۇستىك" وڭق قولباسشىسىنىڭ ورىنباسارى نيازتاي الكەشەۆ.
شەندى قاتارداعى جاۋىنگەردىڭ دەنساۋلىعىندا كىنارات بارىن جانە قانداي كىنارات ەكەنىن اتا-اناسى دا ءاۋ باستا-اق بىلگەن دەدى. ءارى ىلعي بايلانىسىپ، جاعدايىن سۇراپ وتىرىپتى. سول ءۇشىن مامىردىڭ ءۇشى التى ايعا جەتەر-جەتپەس بورىشىن وتەگەن وردابەككە مەرزىمىنەن بۇرىن اسكەري بيلەتى تاپسىرىلىپ، ۇيىنە قايتارىلعان ەكەن.
"ادىرنا" ۇلتتىق پورتالى
Басқалармен бөлісе отырыңыз
پىكىرلەر
