فوتو: yk-news.kz
الماتىدا ترامۆاي قوزعالىسىن قايتا جانداندىرۋ جوسپارلانىپ وتىر. بۇل تۋرالى الماتى باس جوسپار عىلىمي-زەرتتەۋ ينستيتۋتىنىڭ ديرەكتورى اسحات ءسادۋوۆ حالىقارالىق ساۋلەتشىلەر فورۋمىندا مالىمدەدى، دەپ حابارلايدى “ادىرنا”.
ونىڭ ايتۋىنشا، جاڭا جوبا "بارلىق" بازارىنان باستالىپ، تولە بي كوشەسىنىڭ بويىمەن بۇرىنعى ءدالىز ارقىلى قايتا جۇرگىزىلەدى. بۇدان بولەك، ترامۆاي جەلىسى اۋەجايعا دەيىن سوزىلىپ، قالانىڭ شىعىسى مەن باتىسىن بايلانىستىراتىن كولىك دالىزىنە اينالماق. مامانداردىڭ ەسەبىنشە، بۇل جۇيە تۇرعىندارعا نەبارى 20 مينۋتتا دىتتەگەن جەرىنە جەتۋگە مۇمكىندىك بەرمەك.
ايتا كەتەيىك، جوسپارلانعان ترامۆايلار زاماناۋي اككۋمۋلياتورلارمەن جابدىقتالىپ، ەلەكتر اۆتوبۋستارىنداعىداي قوسىمشا ءجۇرىس قورىنا يە بولادى.
"كۇن سايىن الماتىعا جارتى ميلليوننان استام ادام كەلەدى. ولار قالامىزدىڭ ورتالىعىندا جۇمىس ىستەيدى، ءبىلىم الادى، ءتۇرلى ىسپەن شۇعىلدانادى. وسىعان وراي، الەمدىك تاجىريبەدە ءتيىمدى ءارى زاماناۋي شەشىم رەتىندە دالەلدەنگەن ترامۆاي جۇيەسىن ىسكە قوسۋ جوسپارلانىپ وتىر. قازىر بۇل جوباعا قاتىستى نەگىزدەمەلىك قۇجاتتار ازىرلەنىپ جاتىر. قارجىلاندىرۋ كوزدەرى مەن كەلىسىمدەر تۇپكىلىكتى ايقىندالعاننان كەيىن، الداعى 5 جىل ىشىندە جوبا جۇزەگە اسۋى مۇمكىن", - دەدى "الماتىباسجوسپار" عزي باس ديرەكتورى اسحات ءسادۋوۆ.
