بۇگىن قازاقستانداعى 6 قالانىڭ ماڭىنان "ساياجاي" ءۇشىن تەگىن 0,12 گەكتار جەر بەرىلەتىنى ايتىلدى. بۇل جايلى ءماجىلىس دەپۋتاتتارىنىڭ ساۋالىنا جاۋاپ بەرگەن پرەمەر-ءمينيستردىڭ ءبىرىنشى ورىنباسارى رومان سكليار مالىمدەدى، دەپ حابارلايدى "ادىرنا" ۇلتتىق پورتالى.
پرەمەر-ءمينيستردىڭ ءبىرىنشى ورىنباسارى رومان سكليار قازاق ەلىنىڭ قاي قالالارى ماڭىنان ساياجاي ءۇشىن تەگىن جەر بەرىلەتىندىگىن سانامالاپ ايتىپ، ەرەجەنى ءتۇسىندىردى:
«قازىرگى ۋاقىتتا قالا ماڭىنداعى ايماق التى قالادا بەكىتىلگەن: استانا، الماتى، اقتاۋ، تاراز، ورال جانە پەتروپاۆل. قازاقستان ازاماتتارىنا باۋ-باقشا، سونداي-اق ساياجاي قۇرىلىسى ءۇشىن جەكە مەنشىككە اۋىل شارۋاشىلىعى ماقساتىنداعى جەرلەردەن، اۋىلدىق ەلدى مەكەندەردەن جانە قوردان 0,12 گەكتار جەر تەگىن بەرىلەدى. اتالعان ماقساتتا جەر ۋچاسكەلەرى قايتادان تەگىن بەرىلمەيدى. بۇل قۇقىقتى كوپ بالالى وتباسىلار دا، ازاماتتاردىڭ باسقا ساناتتارى دا پايدالانا الادى»، - رومان سكليار.
ۇكىمەت باسشىسىنىڭ ورىنباسارى باۋ-باقشا مەن ساياجاي قۇرۋ ماقساتىنداعى جەر تەلىمدەرىن قالاي بەرىلەتىنىن ناقتىلادى. ونىڭ ايتۋىنشا، تەگىن جەر تەلىمدەرى قالا ماڭىنداعى اۋىلدىق ەلدى مەكەندەردىڭ اۋماعى جانە اۋىل شارۋاشىلىعىنا جارامدى جەرلەردەن بەرىلەدى.
«ساياجاي الاپتارى اۋماعى باۋ-باقشا، كوپجىلدىق جەمىس نەمەسە جيدەك داقىلدارىن، سونداي-اق ساندىك وسىمدىكتەردى وسىرۋگە ارنالعان. بۇل الاپتار ماۋسىمدىق پايدالانۋعا جارامدى ءارى ءتۇرلى داقىلداردى ءوز قاجەتىنە قاراي نەمەسە كەيىننەن ساتۋ ءۇشىن وسىرۋگە ارنالعان»، - دەپ اتاپ وتەدى ءبىرىنشى ۆيتسە-پرەمەر.
"ادىرنا" ۇلتتىق پورتالى
