نىعماتۋلين ديناستياسى قۇلادى ما؟

1707

نىعماتۋلين دەگەن فاميليانى ەستىسە كوپشىلىك پارلامەنت مىنبەرىندەگى دەپۋتاتتاردى «قۋىرىپ وتىرعان» شەنەۋنىكتى ەلەستەتەدى. ول زاڭدى دا. ۇزاق جىلدار بويى نۇرلان نىعماتۋلين پارلامەنت ءماجىلىسىنىڭ توراعاسى لاۋازىمىن يەمدەنىپ كەلدى. «قاسىرەتتى قاڭتار» وقيعاسىنان كەيىن ەلىمىزدە ساياسي وزگەرىستەر باستالدى. بۇرىنعى بيىك قىزمەت، بىلعارى كرەسلودا وتىرعان تالاي شەنەۋنىك قىزمەتىنەن الىندى، ءوز ەركىمەن كەتتى، كەيبىرى ۇستالدى، تەمىر تورعا قامالدى. قىزمەتىنەن كەتكەندەردىڭ اراسىندا نۇرلان نىعماتۋلين دە بار.

اقپاننىڭ العاشقى كۇنىندە نىعماتۋلين ءوز ەركىمەن قىزمەتىنەن كەتەتىنىن ايتتى. ول ءماجىلىس توراعاسى قىزمەتىندە ون جىلعا جۋىق جۇمىس اتقارعان، سالماعى باسىم ساياساتكەردىڭ ءبىرى بولاتىن. «ۇزاق جىلدار بويى ءتۇرلى ساياسي قىزمەت اتقارعان ساتتە، مەن مەملەكەت باسشىسىنىڭ قولداۋىن سەزىنىپ كەلدىم. داۋىس بەرۋشىلەرگە ەرەكشە العىس ايتقىم كەلەدى، ولار وسىنشا جىل بويى پارلامەنتتە ءوز مۇددەلەرىن بىزگە تاپسىرىپ، سەنىم ارتتى. سونىمەن بىرگە بارلىق دەپۋتاتتارعا، بارلىق ءۇش شاقىرىلىمداعى دەپۋتاتتار وكىلدەرىنە شىن جۇرەكتەن العىس بىلدىرگىم كەلەدى»، دەدى ول. ءسوز اراسىندا ول پرەزيدەنتپەن قوسا، نازارباەۆقا دا العىس ايتا كەتۋدى ءجون سانادى. ناقتىراق ايتساق بىلاي دەدى:

«ءار زاڭ ەل دامۋىنا ىقپال ەتەتىن سونداي ءبىر وتە قىزۋ تارتىسقا تولى ماڭىزدى، جاۋاپكەرشىلىگى مول جىلدار بولدى. بۇگىن مەن ەڭ الدىمەن العىس ءسوزىن ەلباسىمىز، Nur Otan پارتياسىنىڭ نەگىزىن قالاۋشى نۇرسۇلتان نازارباەۆقا جانە قازىرگى مەملەكەت باسشىسى مەن پارتيانىڭ تورعاسى قاسىم-جومارت كەمەلۇلىنا بىلدىرگىم كەلەدى، ولار ماعان سەنىم ارتقانى ءۇشىن كوپ العىس»،-  دەدى ەكس ءماجىلىس توراعاسى.

نىعماتۋلينگە قاتىستى ارتىنشا سان ءتۇرلى اقپارات شىقتى. مامىر ايىنىڭ ورتاسىندا نۇرلان نىعماتۋلين ەلدەن كەتتى دەگەن اقپارات پايدا بولدى. الايدا ارتىنشا نۇرلان نىعماتۋليننىڭ نۇر-سۇلتان قالاسىنداعى ساۋدا ۇيلەرىنىڭ بىرىندە، كينوتەاترعا كەلگەن ۆيدەوسى جاريالاندى. ول كينوتەاترعا كىرەر الدىندا تەلەگرام ارنالاردىڭ بىرىنە كىشىگىرىم پىكىر ءبىلدىرىپ، «ەلدەن كەتۋگە سەبەپ جوقتىعىن، ەندىگى ۋاقىتىن نەمەرەلەرى مەن وتباسى جانىندا وتكىزەتىنىن» ايتقان بولاتىن.

الايدا ناۋرىز جاڭالىققا تولى بولدى. اتىشۋلى قايرات ساتىبالدى ۇستالىپ، تەرگەۋگە قامالدى. ول نازارباەۆ اۋلەتىنە جاقىنداردىڭ ءبىرى جانە ەلدەگى تەرىس ءدىني باعىتتىڭ بەيرەسمي كوسەمى سانالادى دەگەن دە اقپاراتتار بار. ارتىنشا قايرات ساتىبالدىنىڭ جۇبايى مەن قايرات بورانباەۆ تا ۇستالدى. بورانباەۆ نۇرسۇلتان نازارباەۆتىڭ بۇرىنعى قۇداسى. وسى اقپاراتتاردان كەيىن نۇرلان نىعماتۋلين ەلدەن كەتتى دەگەن اقپارات تاعى شىقتى. بۇل جولى ناقتى دەرەكتەرمەن. نۇرلان نىعماتۋلين ناۋرىز ايىنىڭ سوڭىندا اتىراۋ قالاسىنا جەكە ۇشاعىمەن ۇشىپ بارىپ، ارتىنشا ازەربايجان استاناسى بككۋگە اتتاندى دەگەن مالىمەت تارادى. ول Comlux كومپانياسىنىڭ بورتىنا وتىرىپ، باكۋگە ۇشقان دەلىنەدى. «وسىلايشا نۇرلان نىعماتۋلين ازەربايجان ارقىلى وزگە ەلگە كەتۋى مۇمكىن جانە اتىراۋعا ۇشۋ تەك ءىز سۋىتۋ ءادىسى» دەگەن جاندار دا بولدى. نىعماتۋليندەر اۋلەتىنە جەكە ۇشاقتىڭ تيەسىلى ەكەنىن ەسكەرسەك، ءبارى دە مۇمكىن.

نىعماتۋليندەر اۋلەتى دەمەكشى. نۇرلان نىعماتۋليننەن بولەك ەرلان نىعماتۋلين دە ەل اۋزىندا جۇرگەن ادام. وتكەن جىلى قازاقستاننىڭ ەڭ بەدەلدى كاسىپكەرلەرىنىڭ ىشىندە فوربس رەيتينگى بويىنشا 32 ورىندى يەمدەنگەن ول، «سارىارقا نان ​​قاراعاندى» جشس، «بالقاش نان» جشس، «پۋلس» جشس (بولشەك ساۋدا، قوناق ءۇي بيزنەسى، قالاارالىق جولاۋشىلار تاسىمالى), «وركەن مەديا» جشس جانە «Trend Capital» جشس ناۋبايحانالارىنىڭ جالعىز قۇرىلتايشىسى بولىپ تابىلادى.

وزگە ەكى تۇلعامەن بىرگە «YDD Corporation» جشس قاراعاندى ​​فەرروقورىتپا زاۋىتىنا يەلىك ەتەدى. ول «قاراجىرا» كومىر ءوندىرۋشى اق اكتسيونەرى، داۆيد كەمەرتەليدزەمەن بىرگە «Qaz Carbon» جشس-ءنىڭ يەسى. بۇل كاسىپتەن بولەك وزگە دە بيزنەس تۇرلەرىنە يە ەكەنى ايتىلىپ ءجۇر.

اتادان بايلىق، اكەدەن ميراس قالماعان سوڭ (كسرو زامانىندا جەكە كاسىپكە تىيىم سالىندى), مۇنداي اسقان بايلىقتى، سانسىز كاسىپ ورنىن قالاي اشقانى، قالاي قول جەتكىزگەنى كوپشىلىككە كۇماندى.

نۇرلان نىعماتۋليءنىڭ ۇلى نۇرجان نۇرلانوۆوڭاي-وسپاق ادام ەمەس. ول وسىعان دەيىن«قازمۇنايگاز-اەرو» كومپانياسىنىڭ باس ديرەكتورى قىزمەتىن اتقارعان ەدى، ال كۇنى كەشە عانا ونىڭ قىزمەتتەن كەتىپ، ورنىنا يلدار شامسۋتدينوۆ ەسىمدى ازاماتتىڭ كەلگەنى جايلى اقپارات تارادى. وسىلايشا اكەسى توراعالىقتان كەتكەن نۇرجان ديرەكتورلىقتان كەتتى.

نىعماتۋليندەرگە قاتىستى پىكىر كوپ. ءبىرى نۇرلاندى تىسقاققان ساياساتكەر ساناپ، «ونىڭ ساياسي امبيتسياسى وراسان ەدى» دەسە، ەكىنشىسى ەسكى بيلىكتىڭ جارقىن وكىلى دەيدى. الايدا ءبىر قىزىعى قىزمەتتەن كەتكەن نىعماتۋليندەرگە قاتىستى قوعامدى ەلەڭ ەتكىزەر قانداي دا ءبىر اقپارات ءالى شىقپادى. قاڭتاردان كەيىن بيلىكتەن كەتكەن ساياساتكەردىڭ سوڭىنان ءسوز بەن انتيكور ەرەتىنىن كوز كورگەن قوعام، بۇل جايتقا تاڭىرقاپ وتىر...

ماقسۇت ساماتۇلى

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket