بۇگىن - قازاقستان رەسپۋبليكاسىنىڭ ەكس-باسشىسى، ەلدى 30 جىلعا جۋىق باسقارعان نۇرسۇلتان نازارباەۆتىڭ سوۆەتتىك قازاقستان پرەزيدەنتى بولعان كۇنى.
1990 جىلى 24 ءساۋىر كۇنى قازاق سسر جوعارى كەڭەسى «قازاق سسر پرەزيدەنتى قىزمەتىن تاعايىنداۋ جانە كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى» زاڭ قابىلدادى. سول كۇنى جوعارى كەڭەس جاڭادان تاعايىندالعان ەڭ بيىك لاۋازىمدى قىزمەتكە 49 جاستاعى نۇرسۇلتان نازارباەۆتى سايلادى.
ونىڭ كانديداتۋراسىنا جوعارعى كەڭەستەگى حالىق دەپۋتاتتارىنىڭ 88% داۋىس بەردى.
ايتا كەتسەك، قازاقستاننىڭ ەكس-پرەزيدەنتى نۇرسۇلتان نازارباەۆ بيلىككە 1989 جىلدىڭ جازىندا كەلدى. 1989 جىلدىڭ ماۋسىمىندا ول قازاقستان كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى بولىپ سايلاندى. 1990 جىلدىڭ ساۋىرىندە پرەزيدەنت بولعاننان كەيىن، 1991 جىلعى 1 جەلتوقسان كۇنى قازاقستان تاريحىندا تۇڭعىش رەت بۇكىلحالىقتىق پرەزيدەنت سايلاۋى ءوتتى. بۇل سايلاۋعا كانديدات بولىپ تۇسكەن جالعىز ادام - نۇرسۇلتان نازارباەۆ قازاق سسر پرەزيدەنتى بولىپ قايتا سايلاندى.
رەسمي مالىمەت بويىنشا، العاشقى بۇكىلحالىقتىق پرەزيدەنت سايلاۋىنا داۋىس بەرۋ قۇقىعىنا يە رەسپۋبليكا ازاماتتارىنىڭ 88,2 پايىزى قاتىسقان. ولاردىڭ 98,7 پايىزى نازارباەۆقا قولداۋ بىلدىرگەن. سودان بەرى نازارباەۆ قازاقستاندى 30 جىلعا جۋىق ۇزدىكسىز باسقارىپ كەلدى. نازارباەۆ الەمدەگى بيلىگى ەڭ ۇزاق بولعان مونارح ەمەس مەملەكەت باسشىلارىنىڭ ءبىرى بولدى.
2019 جىلعى ناۋرىزداعى نارازىلىق شارالارىنا بايلانىستى نازارباەۆ وتستاۆكاسىن جاريالاپ، بيلىكتى وزىنە جاقىن وداقتاسى قاسىم-جومارت توقاەۆقا بەردى.
