سەربيانىڭ RTV قوعامدىق تەلەارناسى ەل پرەزيدەنتى الەكساندر ۆۋچيچ بيلىك قۇرعان جىلدارى بىرجاقتى اقپارات تاراتىپ، بىرقاتار وقيعاعا كوز جۇمىپ قاراعانى ءۇشىن كورەرمەندەردەن كەشىرىم سۇرادى، دەپ حابارلايدى "ادىرنا".
بۇل تۋرالى ارنانىڭ Dnevnik جاڭالىقتار باعدارلاماسىندا ءمالىم بولدى.
26 قازاندا ەفيرگە شىققان جاڭالىقتار باعدارلاماسىندا سەربيا تۇرعىندارىنىڭ پارلامەنت سايلاۋىندا «ستۋدەنتتەر ءتىزىمى» قوزعالىسىنىڭ جەڭىسىن اتاپ ءوتىپ جاتقان ساتتەرى كورسەتىلدى. وسىدان كەيىن باعدارلامانىڭ جۇرگىزۋشىسى گوران ەرور تىكەلەي ەفيردە كورەرمەندەرگە ارنانىڭ بۇرىنعى اقپارات تاراتۋ ساياساتى ءۇشىن كەشىرىم ايتتى.
«قوعامدىق تەلەارنا كوپتەگەن جىل بويى ءوز مىندەتىن اتقارمادى. ءۇنسىز قالدى، كەيبىر جايتتارعا كوز جۇمدى، بىرجاقتى اقپارات تاراتتى، وقيعالاردى سىني تۇرعىدان تالداماي كورسەتتى، ماڭىزدى سۇراقتاردى قويمادى نەمەسە مۇلدە سۇراق قويمادى. سول ءۇشىن كورەرمەننەن كەشىرىم سۇراۋىمىز كەرەك»، – دەدى ول.
جۇرگىزۋشىنىڭ ايتۋىنشا، RTV-ءدىڭ كەيبىر قىزمەتكەرلەرى جۋرناليستەر مەن رەداكتورلاردىڭ ەركىن جۇمىس ىستەۋى ءۇشىن كۇرەسكەنىمەن، بۇل كۇرەستە ۋاقىتىندا جەڭىسكە جەتە الماعان. ول اتالعان جۇمىستى جالعاستىرۋ ماڭىزدى ەكەنىن اتاپ ءوتتى.
وسى مالىمدەمەدەن كەيىن RTV تەلەارناسىنىڭ ءبىرىنشى باعدارلاماسىنىڭ باس رەداكتورى مىندەتىن اتقارۋشى نەناد چاچيچ قىزمەتىنەن كەتتى. ونىڭ ورنىنا بلاجو پوپوۆيچ تاعايىندالدى. «تاۋەلسىزدىك» كاسىپوداعى بۇعان دەيىن ءبىر جىل بويى باسشىلىقتىڭ اۋىسۋىن تالاپ ەتىپ، تەلەارنانى تاۋەلسىزدىگىن جوعالتتى جانە بيلىكتىڭ مۇددەسىنە قىزمەت ەتتى دەپ ايىپتاعان.
