قر ءماجىلىسىنىڭ دەپۋتاتى ەرلان سايروۆ موڭعولياداعى بولعان ساياسي بۇلعاققا قاتىستى پىكىر ءبىلدىردى. ول قازاقستان بيلىگىندەگىلەر مەن وليگارحتاردىڭ "قاسىرەتتى قاڭتار" مەن موڭعولياداعى شەرۋدى ەستەن ەش شىعارماۋى ءتيىس ەكەندىگىن ايتتى. قازاقتىڭ جوعالعان، ۇرلانعان قازىناسىن قايتارۋعا شاقىردى. بۇل جايلى "ادىرنا" ۇلتتىق پورتالى حابارلايدى.
- موڭعولياداعى جاعداي بىزگە ساباق بولۋى كەرەك. ءوزىمىزدىڭ "قاسىرەتتى قاڭتار" ساباقتارى دا ارقاشان ەستە بولۋى باستى اسپەكت. ياعني، مەملەكەت پەن حالىقتىڭ مۇڭ-مۇددەسىنە قارسى شىعىپ، حالىقتىڭ يگىلىكتەرىنەن كۇنەلتكىسى كەلەتىن، شەشىم قابىلداۋ تەتىكتەرىنە جاقىن ءجۇرىپ، ءوزىنىڭ قۇلقىنىن تولتىراتىن توپتار بيلىك اينالاسىنان تازارتىلۋى ءتيىس. وليگارحيا مەن مەملەكەت "توپتاسىپ" كەتكەندە قانداي دا بولماسىن ەلدە مورالدىق قۇندىلىقتار جويىلا باستايدى. ويتكەنى، شىندىق پەن ادىلەتتىلىك جۇمىس ىستەمەي قالادى.
"بالىق باسىنان شىريتىندىگى" ءتارىزدى، ءبىزدىڭ شەشىم قابىلداۋ تەتىكتەرىن، ياعني مينيسترلىكتەردى وليگارحتاردىڭ "اسەر ەتۋىنەن" تازارتۋ قاجەت.
ويتكەنى ادىلەتتىلىك بولماسا، ەلدىڭ بەرەكەسى قاشادى.
سونىمەن بىرگە، ەكىباستۇزدا ماينينگ فيرمالارىن قاپتاتىپ ميللياردتاعان پايدا تاۋىپ، حالىقتى "قان قاقساتىپ" قويعان توپتار انىقتالىپ، جازالانۋى ءتيىس. قۇرىلىپ جاتقان كوميسسيالاردىڭ نەگىزگى جۇمىسى وليگارحتاردىڭ حالىق ەسەبىنەن تاپقان پايدالارىن انىقتاپ، ەلگە قايتارۋ، تەحنوگەندى اپاتقا شىنايى كىالىلەردى انىقتاۋ. حالىق پەن ازاماتتاردىڭ "جوعالعان پايداسى" انىقتالىپ، ەسەلەپ بيۋدجەتكە قايتارىلۋى كەرەك. بۇل ماسەلە بويىنشا حالىقتىڭ، جۇرتشىلىقتىڭ ءۇنى ناق ەستىلۋى ءتيىس، - دەدى دەپۋتات.
"ادىرنا" ۇلتتىق پورتالى
