ريم پاپاسى فرانتسيسك پرەزيدەنت قاسىم-جومارت توقاەۆقا قازاقستانعا كەلۋ جوسپارىن راستادى، دەپ حابارلايدى “ادىرنا” ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
«قاسىم-جومارت توقاەۆ ريم پاپاسى فرانتسيسكپەن بەينەكونفەرەنتسيا ارقىلى كەلىسسوزدەر جۇرگىزدى. كەزدەسۋ بارىسىندا قازاقستان مەن ۆاتيكان اراسىنداعى ىنتىماقتاستىقتى نىعايتۋ پەرسپەكتيۆالارى، سونداي-اق كونفەسسياارالىق كەلىسىم مەن دىنارالىق ديالوگتى ىلگەرىلەتۋ ماسەلەلەرى تالقىلاندى»، - دەلىنگەن حابارلامادا.
اعىمداعى جىلدىڭ قىركۇيەك ايىندا قازاقستان استاناسىندا وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنىڭ كۇن تارتىبىنە ەرەكشە نازار اۋدارىلدى. قاسىم-جومارت توقاەۆ بۇل وقيعانىڭ قازاقستان ءۇشىن ماڭىزى زور ەكەنىن اتاپ ءوتتى.
مەملەكەت باسشىسى سۇحباتتاسۋشىنى كونفەسسياارالىق كەلىسىم مەن بىرلىكتىڭ قازاقستاندىق ۇلگىسى تۋرالى حاباردار ەتتى، سونداي-اق اۋقىمدى ساياسي جانە ەكونوميكالىق رەفورمالاردىڭ جۇزەگە اسىرىلۋ بارىسى تۋرالى ايتتى.
ريم پاپاسى مەملەكەت باسشىسىنا كەزدەسۋ مۇمكىندىگى ءۇشىن ريزاشىلىعىن ءبىلدىردى جانە ونىڭ قازاقستانعا رەسمي ساپارىن، سونداي-اق الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋىن راستادى. ول الداعى ساپار مەن فورۋمعا قاتىسۋدان ۇلكەن ءۇمىت كۇتەتىنىن اتاپ ءوتتى.
«مەن دىنارالىق ديالوگتى، مەملەكەتتەردىڭ بىرلىگىن جانە جاقىنداسۋىن ىلگەرىلەتۋ تۇرعىسىنان وسى ماڭىزدى وقيعانى اسىعا كۇتەمىن، بۇل بۇگىنگى كۇنى وتە ماڭىزدى»، - دەدى فرانتسيسك.
ول قازىرگى كۇردەلى گەوساياسي جاعدايدا الەمدەگى بىرلىك پەن كەلىسىمگە قول جەتكىزۋدىڭ ايرىقشا ماڭىزدىلىعىن اتاپ ءوتتى.
«ءبىز سىزدەردىڭ ەلدەرىڭىزدىڭ قانشالىقتى جان-جاقتى جانە ءبىرتۇتاس ەكەنىن كورىپ وتىرمىز. بۇل تۇراقتىلىقتىڭ نەگىزى. قازاقستاننىڭ مۇنى تۇسىنگەنىنە قۋانىشتىمىز. ءسىز مەنىڭ قولداۋىما تولىعىمەن سەنە الاسىز، مەن ءسىزدىڭ كۇش-جىگەرىڭىزدى باعالايمىن»، - دەدى ريم پاپاسى.
