قازاقستان ۇكىمەتى مەملەكەتتىك باسقارۋ جۇيەسىن وڭتايلاندىرۋعا باعىتتالعان №604 قاۋلىنى قابىلدادى، دەپ حابارلايدى "ادىرنا" ۇلتتىق پورتالى.
قۇجاتقا سايكەس، بىرقاتار مەملەكەتتىك ۇيىم بىرىكتىرىلىپ، قايتا ۇيىمداستىرىلادى. ماسەلەن، ۇلتتىق كينونى قولداۋ مەملەكەتتىك ورتالىعى «قازاقفيلمگە», ال «كامەراتا قازاقستان» ءانسامبلى جامبىل اتىنداعى قازاق مەملەكەتتىك اكادەميالىق فيلارمونياسىنا قوسىلادى.
وقۋ-اعارتۋ مينيسترلىگىنە قاراستى ءۇش ۇيىم ىبىراي التىنسارين اتىنداعى ۇلتتىق ءبىلىم اكادەمياسىنىڭ قۇرامىنا وتەدى. دەنساۋلىق ساقتاۋ جۇيەسىندە رەسپۋبليكالىق قان ورتالىعى عىلىمي-وندىرىستىك ترانسفۋزيولوگيا ورتالىعىمەن بىرىكتىرىلەدى.
سونىمەن قاتار «Talap» كەاق، قولدانبالى ەتنوساياسي زەرتتەۋلەر ينستيتۋتى جانە «دوستىق ەنەرگو» اق تولىق تاراتىلادى.
قاۋلىنىڭ نەگىزگى بولىگى 2026 جىلعى 1 قىركۇيەكتەن باستاپ كۇشىنە ەنەدى. كەيبىر نورمالار 2027-2028 جىلدارى كەزەڭ-كەزەڭىمەن ەنگىزىلەدى.
