كوكشەتاۋ قالاسىنىڭ مەكتەپ باسشىلارى وقۋشىلاردىڭ اتا-انالارىن بالالاردى الەۋمەتتىك جەلى ارقىلى وزىنە تارتاتىن قاۋىپتى ويىندارعا نازار سالۋعا شاقىردى، - دەپ حابارلايدى Tengrinews.kz ءتىلشىسى.
"مۇنداي ويىنداردى ۇيىمداستىرۋشىلار بالالاردى جابىق توپتارعا الداپ قوسىپ، ول جەردە ءتۇرلى سىلتاۋمەن ولىمگە سوقتىراتىن فلەشموبقا قاتىسۋعا شاقىرادى", - دەپ جازىپتى جولداۋ اۆتورلارى.
ولار بالانىڭ وسىنداي ويىننىڭ شىرماۋىنا ىلىنگەنىن بىلدىرەتىن بەلگىلەردى انىقتاعان:
- قارا ءتۇستى كيىم تاڭداۋ، ولىممەن استاساتىن سيمۆولدارى بار بولۋى مۇمكىن;
- سىرت كەلبەتىنىڭ كۇرت وزگەرۋى: سامايىن قىرىپ تاستاۋ، شاشىن تابيعي ەمەس تۇسكە بوياۋ;
- ۇيقىنىڭ بۇزىلۋى: ماۋجىراپ ءجۇرۋ نەمەسە ۇيقىنىڭ جوعالۋى;
- دەنەسىندە تىلىنگەن ىزدەردىڭ، كۇيۋى نەمەسە دەنەگە جاراقات سالۋدىڭ وزگە بەلگىلەرىنىڭ (تىرتىق، ويىق، ءتىلۋ، تەسۋ) بولۋى;
- ۇنەمى ۆيرتۋالدى ومىردە ءجۇرۋى، جەلى ارقىلى حات الماسۋعا قاتتى كوڭىل ءبولۋ (كوبىنە بەيتانىس ادامدارمەن);
- دەۆايستارىنا قولجەتىمدىلىكتىڭ بولماۋى، كومپيۋتەرگە قوسىمشا قۇپيا ءسوز ورناتۋ، پاراقشانى انونيم قاراۋعا مۇمكىندىك بەرەتىن براۋزەرلەردى قولدانۋ;
- ميستيكالىق فيلمدەرگە جانە قاتىگەزدىك كورسەتىلگەن تۇستارىنا قىزىعۋ;
- وزگەشە سيمۆولى بار تاتۋ سالدىرۋعا دەگەن اياقاستى قۇلشىنىس;
- اتا-اناسىمەن قارىم-قاتىناستان قاشۋ جانە كوڭىل-كۇيىن جاسىرۋ;
- جەلىلەردەن قاۋىپتى بەلگىلەردىڭ پايدا بولۋى: الەۋمەتتىك جەلىدەگى كۇيزەلىستى بىلدىرەتىن جازبالاردىڭ پايدا بولۋى، ءوز پاراقشاسىندا ولىمگە بايلانىستى تۇنەرگەن بەينەلەر مەن دايەكسوزدەردىڭ پايدا بولۋى.
"سۋرەتتەردە بەتىن قولمەن نەمەسە كيىممەن قالقالاۋ، وسىنداي سۋرەتتەردە سۇق ساۋساعىن كورسەتۋ، بۇل وزىنە قول سالۋدى مەڭزەيتىن فوتوسۋرەتتەر. مەدۋزا، مىسىق، كوبەلەك، ەدينوروگ، بيىكتەن، توبەدەن تۇسىرىلگەن سۋرەتتەر جانە جوعارى ءجۇزىپ بارا جاتقان كيتتەردىڭ بەينەسى قاۋىپتى ەسەپتەلەدى. الەۋمەتتىك جەلىدەگى پاراقشاسىندا تۇنەرگەن مۋزىكانى ساقتاۋ، سۋيتسيدكە بەيىمدىلىكتى انىق بىلدىرەدى. ەگەر بالاڭىزدان جوعارىدا كورسەتىلگەن بەلگىلىەردىڭ بىرەۋىن بولسا دا بايقاپ، ونىڭ ءولىم توبىنا مۇشە بولعانىنان سەزىكتەنىپ جۇرسەڭىز، وعان داۋىس كوتەرىپ، دەرەۋ دوعارۋدى تالاپ ەتپەڭىز. كەز كەلگەن كيكىلجىڭ ويىنا العانىن جۇزەگە اسىرۋعا يتەرمەلەۋى مۇمكىن. باستىسى بىردەن مەكتەپ پسيحولوگىنا حابارلاسىڭىز", - دەپ ءوتىنىپتى مەكتەپ باسشىلارى اتا-انالاردان.
_________________________________________________________________________________________________________________
